झापा । झापाको मेचीनगरमा भएको मोटरसाइकल दुर्घटनामा घाइते एक महिलाको उपचारका क्रममा मृत्यु भएको छ।
मेचीनगर नगरपालिका–७ नमुना टोलस्थित भित्री सडकखण्डमा काकडभिट्टाबाट भद्रपुरतर्फ जाँदै गरेको मे ९ प ६३९४ नम्बरको मोटरसाइकल र विपरीत दिशाबाट आउँदै गरेको प्र.१–०१–०१७ प ४२६५ नम्बरको मोटरसाइकल एकआपसमा ठोक्किँदा दुर्घटना भएको थियो।
दुर्घटनामा मे ९ प ६३९४ नम्बरको मोटरसाइकल चालक बिर्तामोड नगरपालिका–७ निवासी ६४ वर्षीय भोजराज भण्डारी सामान्य घाइते भएका थिए भने पछाडि सवार उनकी श्रीमती ५४ वर्षीया कल्पना भण्डारी गम्भीर घाइते भएकी थिइन्। टाउको र शरीरमा गम्भीर चोट लागेकी भण्डारीलाई उपचारका लागि बीएण्डसी अस्पताल लगिएको थियो।
घटनाको तीन दिनपछि, मिति २०८२ माघ १४ गते बिहान १०:१५ बजे उपचारकै क्रममा भण्डारीको मृत्यु भएको जिल्ला प्रहरी कार्यालय झापाले जनाएको छ। मृतकको शव सोही अस्पतालमा राखिएको छ।
दुर्घटनामा संलग्न प्र.१–०१–०१७ प ४२६५ नम्बरको मोटरसाइकल चालक मेचीनगर नगरपालिका–६ निवासी ४३ वर्षीय युवराज मुखियालाई इलाका प्रहरी कार्यालय काकडभिट्टाले नियन्त्रणमा लिई घटनाबारे अनुसन्धान गरिरहेको छ।
