अन्तर्राष्ट्रिय डेस्क।विश्वभरि करोडौँ मानिसको ज्यान लिने कोरोना महामारी (कोभिड–१९) को सुरुआत कहाँ र कसरी भयो भन्ने विषयलाई लिएर अमेरिकामा पुनः एकपटक तीव्र राजनीतिक तथा कूटनीतिक बहस सुरु भएको छ। अमेरिकाकी राष्ट्रिय खुफिया निर्देशिका (नेशनल इन्टेलिजेन्स डाइरेक्टर) तुलसी गबार्डले केही संवेदनशील सरकारी दस्तावेजहरू सार्वजनिक गरेसँगै यो नयाँ विवाद सतहमा आएको हो। सार्वजनिक गरिएका गोप्य कागजातहरूको हवाला दिँदै निर्देशिका गबार्डले कोभिड–१९ को उत्पत्ति सम्बन्धी अमेरिकी खुफिया निकायको स्वतन्त्र मूल्याङ्कन र प्रतिवेदनलाई भित्रभित्रै प्रभावित गर्ने प्रयास गरिएको सनसनीपूर्ण दाबी गर्नुभएको छ।
निर्देशिका गबार्डका अनुसार हालै सार्वजनिक गरिएका दस्तावेजहरूले पूर्वअमेरिकी राष्ट्रपति जो बाइडेनका मुख्य चिकित्सा सल्लाहकार रहिसकेका वरिष्ठ संक्रामक रोग विशेषज्ञ डा. एन्थोनी फाउचीको भूमिकामाथि गम्भीर प्रश्न खडा गरेका छन्। चीनको वुहानस्थित प्रयोगशाला (ल्याब) सँग जोडिएको विवादास्पद अनुसन्धानका लागि आर्थिक सहयोग (फन्डिङ) जुटाउने कार्यमा डा. फाउचीले अहम् भूमिका निर्वाह गरेको ती दस्तावेजहरूमा उल्लेख भएको गबार्डको दाबी छ। यद्यपि, यी नयाँ दाबीहरूको स्वतन्त्र रूपले पुष्टि हुन बाँकी नै छ। यसअघि डा. फाउचीले वुहान ल्याबसँग कोरोना भाइरसको सोझो सम्बन्ध रहेको र अमेरिकी कोषको दुरुपयोग भएको भन्ने आरोपहरूलाई संसद् (काङ्ग्रेस) का विभिन्न सुनुवाइहरूमा पूर्ण रूपले खारेज गर्दै आउनुभएको थियो।
राष्ट्रिय खुफिया निर्देशिकाको कार्यालय (ओडीएनआई) द्वारा जारी गरिएका यी दस्तावेजहरूलाई गबार्डले महामारीको उत्पत्ति र यसमा अमेरिकी संस्थाहरूको पर्दापछाडिको भूमिकाको निष्पक्ष समीक्षा गर्ने दिशामा एउटा ऐतिहासिक कदम बताउनुभएको छ। विज्ञप्ति जारी गर्दै उहाँले कोभिड–१९ महामारीले अमेरिका लगायत सम्पूर्ण विश्वका मानिसहरूको जीवन तहसनहस बनाएको उल्लेख गर्नुभएको छ। यस घडीमा अब विश्वका जनताले यसको पारदर्शिता, सत्यता र जबाफदेहिताको माग गरिरहेकाले यसलाई दबाउन नमिल्ने उहाँको तर्क छ।
गबार्डका अनुसार सार्वजनिक गरिएका आन्तरिक रेकर्डहरूले कोरोना भाइरस प्राकृतिक रूपमै पैदा भएको हो या वुहान ल्याबबाट चुहावट (लिक) भएको हो भन्ने विषयमा सुरुवाती दिनहरूदेखि नै उच्च अधिकारी र वैज्ञानिकहरू बीच ठुलो मतभेद र संशय रहेको कुरालाई पुष्टि गर्दछ। कोरोनाको वास्तविक उत्पत्तिको विषयलाई लेकर वैज्ञानिक समुदाय अझै पनि दुई धारमा विभाजित छ। विश्व स्वास्थ्य सङ्गठन (डब्ल्यूएचओ) र कतिपय अन्तर्राष्ट्रिय विशेषज्ञहरू प्राकृतिक रूपमा जनावरबाट मानिसमा यो भाइरस सरेको सम्भावनालाई बलियो मान्छन् भने, अर्कोतर्फ अमेरिकी संसद् र खुफिया निकायका केही प्रतिवेदनहरूले वुहान ल्याबबाटै भाइरस बाहिरिएको हुनसक्ने आशंका गर्दै यसको अझ गहिरो र स्वतन्त्र अनुसन्धान हुनुपर्ने कुरामा जोड दिँदै आएका छन्। नयाँ दस्तावेज बाहिरिएसँगै यो विवादले आगामी दिनमा थप राजनीतिक रूप लिने अनुमान गरिएको छ।
