Writकाठमाडौं । नेपाली कांग्रेसका सभापति गगनकुमार थापा र उपसभापति विश्वप्रकाश शर्माले निवर्तमान सभापति शेरबहादुर देउवासँग भेटवार्ता गरेका छन्।
नवनिर्वाचित सभापति र उपसभापतिद्वय शनिबार दिउँसो देउवाको निवास महाराजगञ्ज पुगेर भेटेका हुन्। भेटमा पछिल्लो राजनीतिक विकासक्रम र पार्टीभित्र देखिएको विवादका विषयमा छलफल भएको बताइएको छ।
कांग्रेसका प्रवक्ता देवराज चालिसेका अनुसार भेटमा पार्टीलाई एकताबद्ध राख्ने विषय मुख्य एजेन्डा थियो। विशेष महाधिवेशनपछि देखिएको मतभेद र त्यसले संगठनमा पारेको प्रभावबारे पनि कुराकानी भएको उनले बताए।
निर्वाचन आयोगले विशेष महाधिवेशन पक्षधरलाई वैधता दिएपछि देउवा पक्षका केही नेताहरू अदालत जाने तयारीमा छन्। तर माघ ६ गते प्रत्यक्षतर्फको उम्मेदवारी दर्ता गर्नुपर्ने समयसीमा नजिकिँदै गएकाले कानुनी प्रक्रियाभन्दा अघि राजनीतिक सहमतिमार्फत समस्या समाधान गर्ने प्रयास थापाले थालेको कांग्रेस नेताहरूको भनाइ छ।
यसअघि विशेष महाधिवेशनपछि देउवा पक्षले गगन थापा र विश्वप्रकाश शर्मालाई पाँच वर्षका लागि पार्टीबाट निष्कासन गरेको थियो। पछिल्लो भेटलाई कांग्रेसभित्रको तनाव कम गर्ने र आगामी चुनावलाई लक्षित गर्दै पार्टीलाई एक ढिक्का बनाउने प्रयासका रूपमा हेरिएको छ।
