झापा, साउन २७ । झापाको दमक नगरपालिका–३ बेलडाँगीमा पार्किङ गरिएको रेडिमेड कपडा लोड मिनी ट्रकमा गएराति भीषण आगलागी हुँदा ठूलो आर्थिक क्षति भएको छ।
प्रहरीका अनुसार राति करिब १२:४५ बजे महेन्द्र तामाङको घर अगाडि सडक छेउमा राखिएको ना ७ ख ८६९१ नम्बरको मिनी ट्रकमा अज्ञात कारणले आगलागी भएको हो। ट्रकमा विभिन्न ७/८ जना व्यापारीका कपडा लोड थिए।
स्थानिय बासी, प्रहरी टोली र दमक नगरपालिकाको दमकलको सहयोगमा आगो राति १:४० बजे पूर्ण नियन्त्रणमा ल्याइएको थियो।
आगलागीबाट कपडामा मात्रै करिब ३० लाख र ट्रकमा करिब ६ लाख रुपियाँको क्षति भई जम्मा ३६ लाख बराबरको क्षति भएको प्रारम्भिक अनुमान छ। मानविय वा चौपाया क्षति भने नभएको प्रहरीले जनाएको छ।
थप अनुसन्धान भइरहेको प्रहरीले जानकारी दिएको छ।
