समीक्षक: नारायण प्रसाद चापागाई
इन्द्र प्रसाद ओली ज्यू द्वारा लिखित दिव्य दृष्टि नेपाली समाजमा मौन रूपमा फैलिँदै गएको लागुऔषध दुरुपयोगविरुद्ध उठेको विवेकपूर्ण चेतनाको आवाज हो। यो पुस्तक अपराधको कथा मात्र होइन, पीडा, कारण र समाधानलाई एकै ठाउँमा समेटिएको मानवीय दस्तावेज हो। नेपाल प्रहरी सेवामा रहँदा लागुऔषध नियन्त्रण अधिकृतका रूपमा आर्जित अनुभवले यस कृतिलाई तथ्य, संवेदना र विश्वसनीयताको गहिराइ दिएको छ।
पुस्तकले लागुऔषधलाई दण्डको आँखाबाट होइन, समाज, मनोविज्ञान र सार्वजनिक स्वास्थ्यको ऐनाबाट हेर्छ। यसले पाठकलाई दोषारोपणभन्दा बाहिर लैजाँदै सहानुभूति र सचेत हस्तक्षेपको मार्ग देखाउँछ। वास्तविक मुल अध्ययन र वैज्ञानिक तथ्यहरूको संयोजनले यसलाई केवल जानकारीमूलक होइन, आत्मबोध गराउने कृति बनाएको छ।
दिव्य दृष्टि ले काठमाडौं उपत्यकादेखि सीमावर्ती सहरहरूसम्म फैलिएको लागुऔषधको यथार्थलाई उजागर गर्दै यसको भौगोलिक र सामाजिक आयाम स्पष्ट गर्छ। यसले समुदाय, विद्यालय र नीति निर्माताहरूलाई मौन नबस्न, समयमै हस्तक्षेप गर्न आह्वान गर्दछ।
सबैभन्दा महत्वपूर्ण पक्ष यसको व्यावहारिकता हो। रोकथाम, चेतना र पुनर्स्थापनाको स्पष्ट दिशानिर्देशका कारण यो पुस्तक पढेर सकिने होइन, समाजमा लागू गर्नुपर्ने कृति हो। भविष्यमा समग्र स्वास्थ्य र माइन्डफुलनेसका अभ्यासहरू समेटिएमा यसले दीर्घकालीन पुनर्स्थापनाको अझ सशक्त मार्ग चित्रण र मार्ग निर्माण गर्न सक्छ।
समग्रमा, दिव्य दृष्टि सामाजिक उत्तरदायित्व र मानवीय संवेदनाले भरिएको समयसापेक्ष कृति हो। सार्वजनिक स्वास्थ्य, शिक्षा र सामाजिक परिवर्तनमा सरोकार राख्ने प्रत्येक व्यक्तिका लागि यो पुस्तक एकपटक होइन, गहिरिएर पटक पटक पढ्नुपर्ने सन्देश हो। लेखक इन्द्र प्रसाद ओलीको यो प्रयासले समाजमा सकारात्मक परिवर्तनको उज्यालो फैलाउनेछ भन्नेमा म पूर्ण विश्वस्त छु।
धन्यवाद
