ढाका । बंगलादेशमा १३औँ राष्ट्रिय संसदीय निर्वाचनअन्तर्गत बिहीबार सम्पन्न मतदानपछि मतगणना जारी छ। प्रारम्भिक परिणामअनुसार बंगलादेश नेशनलिस्ट पार्टी (बीएनपी) नेतृत्वको गठबन्धन स्पष्ट बहुमततर्फ अघि बढिरहेको देखिएको छ।
स्थानीय सञ्चारमाध्यमका अनुसार बीएनपी गठबन्धनले ५० प्रतिशतभन्दा बढी मत हिस्सा हासिल गरेको छ र धेरै निर्वाचन क्षेत्रमा अग्रता बनाएको छ। जमात-ए-इस्लामी नेतृत्वको गठबन्धनले पनि उल्लेखनीय मत प्राप्त गरे तापनि बीएनपीभन्दा पछि परेको छ।
सन् २०२४ जुलाईमा भएको विद्यार्थी आन्दोलन र त्यसपछि शेख हसीनाको सत्ताच्युतिपछि आयोजित यो पहिलो निर्वाचन हो। मोहम्मद यूनुस नेतृत्वको अन्तरिम सरकारले निर्वाचन प्रक्रिया सम्पन्न गराएको हो।
पूर्व प्रधानमन्त्री शेख हसीनाले निर्वाचनलाई ‘नाटक’को संज्ञा दिँदै निष्पक्ष पुनःनिर्वाचनको माग गरेकी छन्।
हालको परिणाम कायम रहेमा बीएनपी अध्यक्ष तारिक रहमान बंगलादेशका आगामी प्रधानमन्त्री बन्ने सम्भावना देखिएको छ।
