काठमाडौं । नवघोषित प्रगतिशील लोकतान्त्रिक पार्टीका नेता तथा पूर्वप्रधानमन्त्री बाबुराम भट्टराईले ‘जेनजी’ आन्दोलनको मर्म अनुसार नयाँ पार्टी गठन गरिएको बताएका छन्।
आइतबार काठमाडौंमा भएको पार्टी घोषणा कार्यक्रममा भट्टराईले जेनजी युवाहरूको भावना र चाहनालाई समेट्दै राजनीतिक पुनर्संरचना आवश्यक रहेको बताए। उनका अनुसार, यदि यस्तो पुनर्संरचना नभए नेपाल विश्वसँगै अघि बढ्न सक्दैन। प्रगतिशील लोकतान्त्रिक पार्टी जेनजी पुस्तासँग जोडिएको भएकाले युवाहरूले नै पार्टीको नेतृत्व लिनुपर्ने उनले स्पष्ट पारे।
भट्टराईले वर्तमान कम्युनिष्ट राजनीतिक आन्दोलनमा ठगी प्रवृत्ति देखिएको र त्यसकारण धेरै दिन टिक्न नसक्ने तर्क गरे। धरापमा परेको लोकतन्त्र र जटिल भूराजनीतिक परिस्थितिबाट देशलाई अघि बढाउन वैकल्पिक शक्तिहरू एकसाथ आउनुपर्ने उनको धारणा छ।
पार्टीका अन्य नेताहरूले पनि पार्टी गठनको उद्देश्य स्पष्ट पारे। जनार्दन शर्माले पार्टीभित्रका पुराना संरचनामा रहेको भ्रष्टाचार, परिवारवाद र सत्ताको कुर्सीको खेलका कारण युवाहरूमा चरम निराशा छाएको र यही कारण जेनजी आन्दोलन सुरु भएको बताए। उनले निकट भविष्यमा राजनीतिक पुनर्संरचना सम्मेलन आयोजना गर्ने जानकारी पनि दिए।
सन्तोष परियारले नयाँ पार्टीले समावेशी सामूहिक नेतृत्वको विकास गरेको र यसबाट जनतालाई केन्द्रमा राखेर लोकतन्त्र बलियो बनाउने बताए। राम कार्कीले म्याद सकिएको नेतृत्वलाई प्रतिस्थापन गर्न जेनजी पुस्तालाई सुझाव दिनुपर्ने र सुदन किरातीले देशभरका जनताको तस्बिर अब पार्टीमा समेटिने बताए।
