काठमाडौं, जेठ १२। नेकपाको संसदीयका प्रमुख सचेतक देव गुरुङले पार्टीको निर्णय विना एमसीसी पारित हुन नसक्ने दावी गरेका छन् । सरकारले वा प्रधानमन्त्रीले भन्दैमा पार्टीले मान्नु पर्छ भन्ने नभएको तर्क गर्दै उनले सरकारले वा प्रधानमन्त्रीले पार्टीको निर्णय मान्नु पर्ने बताए।
उनले बहुदलीय व्यवस्थामा पार्टीको निर्णय सर्वोपरी हुने दावी गरे । “सत्तारुढ दलको निर्णयलाई सरकारले कार्यान्वयन गर्ने हो, राष्ट्रिय महत्व र दिर्घकालिन असर पर्ने निर्णय गर्दा पार्टीको निर्णय अनिवार्य हुन्छ,” गुरुङले भने ।
अहिलेकै अवस्थामा एमसीसी पारित गर्नु राष्ट्रघाती हुने दावी गर्दै उनले कुनै हालतमा पारित हुन नदिने अठोट व्यक्त गरे । एमसीसीलाई अमेरिकाले नै आफ्नो सैन्य परियोजना अन्तर्गतकै विषय भनेर भनिसकेकाले सैन्य परियोजनालाई पारित गर्न नहुने उनले उल्लेख गरे ।
नेपाल सरकारले र परराष्ट्र मन्त्री प्रदीप ज्ञवालीले सैन्य परियोजना होईन भनेपनि पत्याउन सकिने आधार नरहेको नेता गुरुङको भनाई छ । एमसीसीका बारेमा पार्टी भित्र चरम मतभेद रहेको स्विकार गर्दै उनले पार्टीमा व्यापक छलफल भएपछि जे निर्णय हुन्छ, त्यही अनुसार गर्नु पर्नेमा जोड दिएका छन्।
