झापा, कचनकवल — कचनकवल गाउँपालिका–३ (दल्की) की २२ वर्षीया अस्मिता देवानले मंगलबार आत्महत्या गरेकी छन्। गाउँका लागि गौरव, कोशी प्रदेशका लागि प्रेरणास्रोत मानिने अस्मिताको निधनले सम्पूर्ण समुदाय स्तब्ध बनेको छ।
साधारण स्वभाव, मेहेनत र अनुशासनको प्रतिमूर्ति अस्मिता २०७९ सालको कक्षा १२ को परीक्षामा प्रदेशकै उत्कृष्ट विद्यार्थी बन्न सफल भएकी थिइन्। उनले कचनकवल विद्या मन्दिर माविबाट परीक्षा दिएर आफ्नो प्रतिभा र लगनशीलताको उज्जवल उदाहरण प्रस्तुत गरेकी थिइन्। यस उपलब्धिको सम्मानस्वरूप गाउँपालिका, बनियानीले उनलाई विशेष पुरस्कारसमेत प्रदान गरेको थियो।
अस्मिता केवल मेधावी मात्र होइनिन्, उनी मित्रता र मानवीयताको प्रतिक पनि थिइन्। परिवारप्रति कर्तव्यनिष्ठा, साथीहरूप्रति मिलनसार व्यवहार र भविष्यबारे स्पष्ट दृष्टिले उनी सबैको मनमा बस्न सफल थिइन्।
उनको असामयिक निधनले गाउँमा मानसिक स्वास्थ्य सम्बन्धी चुनौतीहरूको गम्भीरता पुनः उजागर गरेको छ। समुदायका अभिभावक, शिक्षक र विद्यार्थीहरूका लागि यो घटनाले युवामा पर्ने दबाब, उनीहरूको मनोस्थिति र आवश्यक समर्थनबारे संवेदनशील बन्न आह्वान गरेको छ।
अस्मिताजस्ता उज्यालो भविष्य बोकेका युवाको निधनले कचनकवलले एउटा होनहार सन्तान गुमाएको छ। देवान परिवारलाई धैर्य र समर्थन मिलोस् भन्ने प्रगाढ समवेदना व्यक्त गर्दै यस घटनाले सम्पूर्ण परिवार, विद्यालय र समुदायलाई मानसिक स्वास्थ्यप्रति सजग बन्न प्रेरणा दिनुपर्ने आवश्यकता दर्शाएको छ।
