भद्रपुर । झापाको भद्रपुरमा नाबालिकामाथि जबरजस्ती करणी गरेको आरोपमा दुई युवक पक्राउ परेका छन्। प्रहरीका अनुसार भद्रपुर नगरपालिका–५ निवासी २१ वर्षीय अक्षय सापकोटा र भद्रपुर नगरपालिका–३ निवासी २३ वर्षीय विवेक राई पक्राउ परेका हुन्।
प्रहरीका अनुसार मिति २०८२/०८/२७ गते साङ्केतिक नाम ब–१ (१५) र भ–१ (१३) घरबाट हिँडी बेपत्ता भएका थिए। मिति २०८२/०८/२९ गते परिवारजनले फेला पारी सोधपुछ गर्दा उनीहरू मिति २०८२/०८/२८ गते भद्रपुर बजारमा मेला घुम्ने क्रममा ती युवकहरूसँग भेट भएको बताएका थिए।
पीडितका कथनअनुसार आरोपितहरूले ललाइफकाइ गरी उनीहरूलाई अक्षय सापकोटाको घरमा लगेको र मिति २०८२/०८/२८ गते अन्दाजी दिउँसो १२:३० बजे छुट्टाछुट्टै कोठामा राखी जबरजस्ती करणी गरेको बताएका छन्। विवेक राईले साङ्केतिक नाम ब–१ माथि र अक्षय सापकोटाले साङ्केतिक नाम भ–१ माथि करणी गरेको आरोप छ।
घटनाबारे जानकारी पाएलगत्तै प्रहरीले अनुसन्धान अघि बढाउँदै मिति २०८२/०९/०१ गते विवेक राई र मिति २०८२/०९/०२ गते अक्षय सापकोटालाई पक्राउ गरेको जनाएको छ। घटनाबारे थप अनुसन्धान भइरहेको जिल्ला प्रहरी कार्यालय झापाले जनाएको छ।
