हल्दिबारी गाउँपालिका लागि नेकपा एमालेका उम्मेदवारहरुले पार्टीले सार्वजनिक गरेको प्रतिबद्धता पत्रलाई पार्टीको निर्देशन र जनताको आवश्यकतालाई ध्यानमा राखेर पालना गर्ने प्रतिबद्धता जनाएका छन् ।
गाउँपालिका अध्यक्षका उम्मेद्बार डम्बरबहादुर गिरी र उपाध्यक्ष पदका उम्मेद्बार शान्तादेवी गौतमले आफूहरु पार्टीको सिपाही र जनताको सेवक भएकाले विकासका लागि प्रतिवद्वतापत्र अक्षरशः कार्यान्वयन गर्ने बताएका हुन् ।
उनीहरुले आफ्नो ५ वर्षको कार्यकालमा रचनात्मक ढंगले प्रतिवद्धता पूरा गर्ने बताए । प्रतिवद्धता पत्रमा जनताका मौलिक अधिकार र जनमुखी योजना भएकाले स्थानीय स्रोत र साधनकोअधिकतम प्रयोग गरिने बताए । आम मतदातालाई नेकपा एमालेले तयार गरेको घोषणापत्र एकपटक गम्भीरतापूर्वक अध्ययन गर्न आग्रह गरेका छन् ।
पार्टी उम्मेद्बार र निर्वाचन परिचालन कमिटीलाई सम्बोधन गर्दै अध्यक्ष पदका उम्मेद्बार गिरीले अघिल्लो कार्यकालमा न्याय सम्पादनसँगै विकासको कामको पनि नेतृत्व गरेको र अब बाँकी रहेका कामलाई पुर्णता दिने प्रतिवद्धता ब्यक्त गरे । यस्तै उपाध्यक्ष उम्मेदवार गौतमले न्यायिक र समतामूलक समाज निर्माण गर्दै बीमा, स्वास्थ्य, शिक्षा, कृषि, पशुपंछी, पर्यटन, खेलकुद, महिला, बालबालिका लगायतका विभिन्न क्षेत्रका महत्वपूर्ण योजनाहरुलाई प्रतिवद्वता पत्रमा समेटिएको र हावादारी कुरा नभएकाले प्रतिबद्धता पत्र अनुसार काम गर्ने बताइन् ।
यहाँको मुख्य स्रोत कृषि र पर्यटन नै भएकाले दीर्घकालीन लक्ष्य प्राप्त गर्ने गरी योजना बनाएर उत्कृष्ट पालिका निर्माण गर्न जनता कै सुझाव अनुसार रणनीतिक काम गर्ने उल्लेख गरे ।
यसैबीच, नेकपा एमाले हल्दिबारीले आयोजना गरेको निर्वाचन विशेष कार्यक्रमलाई सम्बोधन गर्दै पार्टी स्थायी कमिटी सदस्य तथा झापा जिल्ला इन्चार्ज अग्नि खरेलले सबै तिक्ततालाई बिर्सेर एमाले उम्मेद्बारलाई विजयी गराउन निर्देशन दिएका छन् । आज सोमबार पार्टीको एक विशेष बैठकमा खरेलले झापाका १५ वटा पालिकामध्ये हल्दिबारीलाई राजनैतिक रूपमा महत्त्वका हेरिएकोले सूर्य ध्वजाबाहक उम्मेद्बारलाई बिजयी गराएर ब्यबस्था बिरोधीलाई ठेगान लगाउन आग्रह गरेका हुन् ।
यस्तै पार्टीका केन्द्रीय सदस्य तथा जिल्ला सह इन्चार्ज रबिन कोइरालाले युद्धस्तरमा पार्टीका सबै नेताकार्यकर्ता अग्रभागमा रहेर चुनावी प्रचारप्रसारमा लाग्न र विजयको झण्डा फहराउन आग्रह गरे । उक्त विशेष कार्यक्रममा उम्मेद्बारहरु तथा निर्वाचन परिचालन कमिटीका पदाधिकारी सदस्यहरुको उपस्थिति थियो । निर्वाचन परिचालन कमिटी संयोजक सोमनाथ पोर्तेलको अध्यक्षता रहेको कार्यक्रमको संचालन पार्टीका जिल्ला सदस्य तथा गाउँपालिका इन्चार्ज नरेश चुडालले गरेका थिए।
