झापा । अष्ट्रेलियाविरुद्धको एशेज शृंखलामा इङ्ग्ल्याण्ड फेरि दबाबमा परेको छ। मेलबर्न क्रिकेट मैदानमा भइरहेको चौथो टेस्टको पहिलो दिन नै इङ्ग्ल्याण्ड ११० रनमा अलआउट भएको छ।
पहिलो दिन कुल २० विकेट झरेका छन्, जुन एशेज शृंखलाको इतिहासमा ११६ वर्षयताकै सबैभन्दा धेरै हो। यसअघि ११६ वर्षअघि पर्थ टेस्टको पहिलो दिन १९ विकेट झरेका थिए।
खेलअघि अष्ट्रेलियाका कप्तान स्टिभ स्मिथले पिचमा रहेको करिब १० मिलिमिटर लामो घाँसले ब्याट्सम्यानहरूका लागि चुनौती सिर्जना गर्ने बताएका थिए। उनको यो अनुमान मैदानमा पूर्ण रूपमा सही सावित भयो।
पहिले ब्याटिङ गरेको अष्ट्रेलिया ४५.२ ओभरमा १५२ रनमै समेटियो। त्यसपछि ब्याटिङमा आएको इङ्ग्ल्याण्ड पनि पिचमा टिक्न सकेन र २९.५ ओभरमै ११० रनमा अलआउट भयो।
यो टेस्ट क्रिकेटको इतिहासमा तेस्रो पटक हो, जहाँ कुनै खेलको तेस्रो इनिङ पहिलो दिनमै सुरु भएको छ। मेलबर्नमा देखिएको यो असामान्य दिनले एशेज शृंखलालाई अझ रोचक मोडमा पुर्याएको छ।
