हल्दिबारी, असोज ८ गते, बुधबार: आज शारदीय नवरात्रको तेस्रो दिन, हिन्दु धर्मावलम्बीहरूले माता चन्द्रघण्टा देवीको विशेष पूजा तथा आराधना गर्दैछन्। नवदुर्गाको तेस्रो स्वरूप मानिने माता चन्द्रघण्टाको पूजा गर्दा सबै प्रकारका दुःख, कष्ट र संकट नाश भई जीवनमा सुख-शान्ति प्राप्त हुने धार्मिक विश्वास रहेको छ।
चन्द्रघण्टा देवीको स्वरूप
धर्मशास्त्र अनुसार, मस्तकमा घण्टीको आकारको अर्धचन्द्र धारण गरेकी हुनाले देवीको नाम चन्द्रघण्टा रहन गएको हो। सुनौलो वर्णकी यी देवीको दश हात छन्, जसमा त्रिशूल, गदा, तरवार, कमण्डलु, धनुष, बाण, कमल पुष्प र माला जस्ता हतियार तथा वस्तुहरू सजिएका छन्। सिंहलाई वाहन बनाएकी माता चन्द्रघण्टाको घण्टीको तीखो आवाजले दानव र राक्षसहरू डराउँछन् भन्ने मान्यता छ।
पूजाको विधि र महत्त्व
माता चन्द्रघण्टालाई विशेषगरी दूधजन्य परिकार र रातो रङका फूलहरू अर्पण गरिन्छ। पूजाका लागि फूल, अक्षता, धूप, दीप, नैवेद्य (दुधजन्य परिकार), गंगाजल, चन्दन र बेलपत्रको प्रयोग गरिन्छ। सफा कपडा लगाएर संकल्प लिई कलश स्थापना गरी पूजा गर्ने गरिन्छ। यस दिन ‘ॐ चन्द्रघण्टायै नमः’ मन्त्रको जप गर्नु शुभ मानिन्छ। साथै, दुर्गा सप्तशती चण्डीको तेस्रो अध्याय पाठ गर्नाले पनि विशेष फल प्राप्त हुने विश्वास छ। माता चन्द्रघण्टाको पूजाले साधकमा वीरता, निडरता, सौम्यता र विनम्रताको विकास हुनुका साथै आत्मबल बढ्ने र नकारात्मक ऊर्जा हट्ने धार्मिक विश्वास रहेको छ।
