एजेन्सी /ढाका — बङ्गालको खाडीमा एउटा ठूलो र कारुणिक दुर्घटना भएको छ। रोहिङ्ग्या मुस्लिम शरणार्थीहरू सवार दुईवटा नाउ म्यानमारको तट नजिकै डुब्दा कम्तीमा ५०० जनाको ज्यान गएको आशङ्का गरिएको छ। संयुक्त राष्ट्र सङ्घले यो विश्वकै सबैभन्दा ठूलो समुद्री दुर्घटनाहरूमध्ये एक हुन सक्ने चेतावनी दिएको छ। अन्तर्राष्ट्रिय आप्रवासन सङ्गठन (IOM) र संयुक्त राष्ट्र सङ्घीय शरणार्थी उच्चायोग (UNHCR) ले घटना र मृतकको आधिकारिक पुष्टि हुन बाँकी भए पनि यति ठूलो सङ्ख्यामा मानवीय क्षतिको खबरले आफूहरू स्तब्ध र चिन्तित बनेको जनाएका छन्।
प्रारम्भिक जानकारी अनुसार यी नाउहरू म्यानमारको गृहयुद्ध ग्रस्त रखाइन प्रान्तबाट जुन महिनाको अन्तिम सातातिर प्रस्थान गरेका थिए। यात्रामा रहेका केही यात्रुहरू बङ्गलादेशका शरणार्थी शिविरबाट समेत नाउमा सवार हुन पुगेका थिए। एउटा नाउमा कम्तीमा २५० जना मानिस सवार थिए, जुन प्रस्थान गरेपछि समुद्रमा बेपत्ता भएको थियो। त्यस्तै करिब २८० जना सवार रहेको दोस्रो नाउ म्यानमारको अयेयारवडी तट नजिकै जुलाई ८ तारिखका दिन दुर्घटनामा परेको हो। बङ्गालको खाडीमा मनसुन सक्रिय रहेको यो समयमा रोहिङ्ग्याहरू सामान्यतया समुद्र पार गर्नबाट बच्ने गर्छन्। संयुक्त राष्ट्र सङ्घका एजेन्सीहरूका अनुसार मनसुनी वर्षा र तीव्र छालका कारण अहिलेको समयमा यो क्षेत्रमा समुद्री यात्रा गर्नु अत्यधिक खतरनाक मानिन्छ।
बङ्गलादेशमा हाल करिब १२ लाख रोहिङ्ग्या मुस्लिम शरणार्थीहरू बसोबास गरिरहेका छन्, जसलाई म्यानमारले आफ्नो नागरिक स्वीकार गर्न तयार छैन। म्यानमारमा गृहयुद्ध चर्किएपछि यी मानिसहरू ज्यान जोगाउन बङ्गलादेशतर्फ भागेका थिए। म्यानमारमै रहेका बाँकी रोहिङ्ग्याहरू पनि कडा सुरक्षा घेरा, हिँडडुलमा प्रतिबन्ध र आधारभूत सुविधाहरूबाट वञ्चित भई कष्टकर जीवन बिताउन बाध्य छन्।
लामो समयदेखि रोजगारी र सुरक्षित जीवनको खोजीमा दक्षिण-पूर्वी एसियाली देशहरू तर्फ खतरनाक समुद्री मार्गबाट भाग्ने क्रममा सयौँ रोहिङ्ग्या महिला तथा बालबालिकाले ज्यान गुमाइसकेका छन्। UNHCR को तथ्याङ्क अनुसार सन् २०२५ मा मात्रै ६,५०० रोहिङ्ग्याले यो जोखिमपूर्ण समुद्री बाटो रोजेका थिए, जसमध्ये ९०० जना मारिएका वा बेपत्ता भएका थिए। यस तथ्याङ्कले उक्त वर्षलाई यो यात्राका लागि सबैभन्दा घातक वर्ष साबित गरेको छ। एजेन्सीका अनुसार बङ्गालको खाडी र अण्डमान सागरको यो मार्ग विश्वमै शरणार्थी र आप्रवासीहरूका लागि सबैभन्दा बढी ज्यान लिने खतरनाक मार्ग बनिसकेको छ।
