हङ्कङको ताइ पो इलाकास्थित वाङ्फुक कोर्ट हाउजिङ कम्प्लेक्समा बुधबार दिउँसो लागेको आगलागीले ज्यान गुमाउनेको सङ्ख्या ७५ पुगेको छ। यस घटनामा ७६ जना घाइते भएका छन्, जसमा १० जना अग्निनियन्त्रक पनि छन्।
ती भवनहरूमा अझै केही मानिस फसेका छन् भने करिब ३०० भन्दा बढी मानिसको अवस्था अज्ञात छ। सन् १९८३ मा बनाइएका आठवटा ३१-३१ तलाका भवनमध्ये सातवटा प्रभावित भएका छन्। आगो फैलिनुमा बाँसका खटहरू, पोलिस्टिरिन झ्याल र बाहिरी वस्तुहरू मुख्य कारण देखिएका छन्।
हङ्कङको अग्निनियन्त्रक विभागले यसलाई ‘लेभल फाइभ’ अर्थात् सबैभन्दा उच्च स्तरको आगो घोषणा गरेको छ। आगो निभाउन करिब ७६७ अग्निनियन्त्रक, १२८ दमकल, ५७ एम्बुलेन्स र ४०० प्रहरी खटाइएको थियो।
प्रहरीले निर्माण कम्पनीका तीन अधिकारीहरूलाई मनसायरहित हत्या र गम्भीर लापरबाहीको आशङ्कामा पक्राउ गरेको छ। घटनामा कम्तीमा दुई इन्डोनेशियाली कामदारको मृत्यु भएको पुष्टि भएको छ।
विस्थापित मानिसहरूलाई नजिकैका आपत्कालीन आश्रयस्थलमा लगिएको छ। आगलागीको पूर्ण नियन्त्रण कहिले हुने भन्ने अझै निश्चित छैन।
