विश्व फुटबलका जादुगर लियोनल मेस्सीले मैदानबाहिर पनि एउटा ठूलो आर्थिक साम्राज्य खडा गर्दै आधिकारिक रूपमा ‘अरबपति’ खेलाडीको सूचीमा आफ्नो नाम दर्ता गराएका छन्। पोर्चुगिज स्टार क्रिस्टियानो रोनाल्डोपछि यो ऐतिहासिक उपलब्धि हासिल गर्ने मेस्सी विश्वकै दोस्रो फुटबलर बनेका हुन्।
ब्लुमबर्गले हालै सार्वजनिक गरेको एक विश्लेषणअनुसार, ३८ वर्षीय अर्जेन्टिनी फरवर्ड मेस्सीले सन् २००७ यता केवल क्लबको पारिश्रमिक र बोनसबाट मात्रै ७० करोड अमेरिकी डलरभन्दा बढी आम्दानी गरिसकेका छन्। यसबाहेक विभिन्न व्यावसायिक सम्झौता, कर कटौतीपछिको बचत र अन्य क्षेत्रमा गरिएको लगानीलाई जोड्दा उनको कुल सम्पत्ति १ अर्ब अमेरिकी डलरभन्दा माथि पुगेको छ। मैदानभित्र मात्र नभई व्यावसायिक दुनियाँमा पनि आक्रामक बन्दै गएका मेस्सीले हालै स्पेनको पाँचौँ डिभिजनको क्लब ‘कोर्नेला’ खरिद गरेर फुटबल मालिकको रूपमा समेत आफ्नो नयाँ यात्रा सुरु गरेका छन्। सन् २०२३ मा साउदी क्लब अल नासरमा आबद्ध भएपछि रोनाल्डो अरबपति बनेका थिए भने मेस्सीले अमेरिकी क्लब इन्टर मियामीमा रहेर यो उचाइ छोएका हुन्।
अमेरिकामा जारी मेस्सी क्रेज अब खेल मैदानमा मात्र सीमित छैन। सन् २०२६ को फिफा विश्वकपको तयारी तीव्र भइरहेका बेला अमेरिकाको न्युजर्सी राज्यस्थित बर्कले हाइट्स नगरले फुटबल स्टार मेस्सीको सम्मानमा एउटा सडकको नामकरण नै उनको नाममा गरेको छ। करिब १३ हजार जनसङ्ख्या भएको उक्त सानो नगरले फुटबल खेलमा मेस्सीले पुर्याएको अतुलनीय योगदानको कदर गर्दै आफ्नो क्षेत्रको ‘शर्मन एभिन्यू’ को एउटा खण्डलाई आधिकारिक रूपमा ‘लियो मेस्सी वे’ नाम दिएको हो। सन् २०२२ मा अर्जेन्टिनालाई विश्वकपको उपाधि दिलाएका मेस्सी हाल अमेरिकी सकर संस्कृतिलाई नै पुनर्भाषित गर्ने एक प्रभावशाली व्यक्तित्वका रूपमा स्थापित भएका छन्। मैदानभित्रको जादु र मैदानबाहिरको यो लोभलाग्दो ब्रान्ड भ्यालुले मेस्सीलाई खेल इतिहासकै सबैभन्दा सफल र धनी खेलाडीको रूपमा अगाडि बढाएको छ।
