राजवंशी भाषिक कविता : “मनेर सारथी”
( बिसंगती कविता )
सुनेक बुझेक ए .. मनेर सारथी
ना बनेक तुई .. अंगेर महारथी।
तोक त आगुवा हबे .. लक्ष्यर सँगे,
तुई भुलिए ना रोहो ..मोर देहार अंगे।।
तुई जाँनिस छुटुवा फेर?.. असल- खाराब,
बिना दोषे लाग्बे ..केङ्करे? कुआर साराँप।
तोक त उठुवा लागे सारथी .. हलबल करे
यिला देहाडर अंगला .. गटेलाए हए तहरे।।
तुई जदि बठिए रहले .. किखान हबे घरे,
तहरे बले रे सारथी .. तुई निआगाले निडरे।
यिड बिधीरअ् लागाबे .. दोष तहरे पर,
यिड् जीवनेर अर्थ .. हबे बेकार-बेखबर ।।
जैखाने छे अस्मिता .. तुई अैखानते करेक भर
निँजा बले उठिए देखेक ..बेनाए देहारक कर्कर।
हातत जे छे लिए .. उठेक्ना बलबुद्धी जरिए
तुहे निआगाए रे सारथी .. जाछित पिछुत परिए।।
देखेक्ना यिड् संसार .. आगाचे परिवर्तनेर सँगे
कर्ले सबकुछ हबे हेतान ..तुई आँगाना आफ्नार रंगे।
जेतेक तुई जागिए उठबो .. बाँझिए देहा हबे दर्दर,
सृष्टि कर्ता झुकिएने एकदिन .. भक्ति कर्बे तोरपर।।
