बिर्तामोड, झापा । प्रतिबन्धित लागुऔषध ब्राउन सुगरसहित झापाको बिर्तामोड नगरपालिका–४ स्थित मुनाल टोलबाट दुई युवकलाई प्रहरीले पक्राउ गरेको छ।
मिति २०८२ असोज २५ गते साँझ करिब ७ः४० बजे इलाका प्रहरी कार्यालय अनारमनी र लागुऔषध नियन्त्रण ब्युरो काकरभिट्टा शाखाबाट खटिएको संयुक्त प्रहरी टोलीले उनीहरूलाई नियन्त्रणमा लिएको हो।
पक्राउ पर्नेमा भद्रपुर नगरपालिका–१ पाण्डे चोक निवासी २५ वर्षीय निरोज लिम्बु र भद्रपुर नगरपालिका–२ पृथ्वीनगर निवासी २६ वर्षीय सागर प्रधान रहेका छन्। उनीहरूको साथबाट ब्राउन सुगरजस्तो देखिने लिसाइलो पदार्थ प्लास्टिकसहित ४६ ग्राम र प्लास्टिकबाहेक ४१ ग्राम ५८० मिलिग्राम बरामद गरिएको प्रहरीले जनाएको छ।
त्यसैगरी प्रहरीले उनीहरूको साथबाट स्क्रिन टच मोबाइल दुई थान, किप्याड मोबाइल एक थान र प्र.१–०१–०१५ प ३४२७ नम्बरको स्कुटरसमेत नियन्त्रणमा लिएको छ।
पक्राउ परेका दुवै जनालाई इलाका प्रहरी कार्यालय अनारमनीमा राखी थप अनुसन्धान भइरहेको प्रहरीले जनाएको छ।
