कहाँ छौ ऐ धरा को अधिष्ठाता ?
जुन अभिष्टित लिप्सा मा जहाँ छौ,
आएर त एक नजर हेरी देउ
जहाँ चर्कीदैछन् सिमान्तका माटाहरू,
लुटिँदैछ मातृत्व को अस्मिता
भत्किँदैछन् सरहद का स्तम्भहरू,
अनी !अनी मेरी प्यारी लिम्पिया,
कुन अवस्था मा रहेकी होली ?
सम्झिन्छु उस्का प्रेमिल नजरहरू
सायद कारुण्य पुकार गर्दै होलान ?
मुटु चुँडिदा मा तिम्रा व्यथाहरु
संयमित हुनू तिमी अली जहाँ छौ,
कहाँ छौ ऐ धरा को अधिष्ठातारु
जुन अभिष्टित लिप्सा मा जहाँ छौ ?
उठाएर हात एक पटक हेरी देऊ
किन जर्जर भए सारा भावनाहरु !
कोहि त होला अस्मिता को रक्षक
जो रोक्न सकोस रिपुका ती बाटाहरू ?
अनी सम्मुख बढिरहेका शिकंजा
भंग गर्न सकोस उस्का शक्त हस्तहरू,
कती सम्झिन्छु तिम्लाई लिम्पिया ?
छहरा, पहरा र कालीका झरनाहरू,
अब केवल स्वप्निल लाग्न थाल्यौ
हेर्न लालायित छु म तिमी जहाँ छौ?
कहाँ छौ ऐ धरा को अधिष्ठाता
जुन अभिष्टित लिप्सा मा जहाँ छौ?
आएर त एक नजर हेरी देऊ
जहाँ चर्कीदैछन् सिमान्तका माटाहरू,
लुटिँदैछ मातृत्व को अस्मिता
भत्किँदैछन् सरहद का स्तम्भहरू।
