झापाको भद्रपुरस्थित एक प्लाई उद्योगमा मध्यराति भीषण आगलागी हुँदा १ करोड ७० लाख रुपैयाँभन्दा बढीको ठूलो भौतिक क्षति भएको छ। भद्रपुर नगरपालिका वडा नम्बर ५ स्थित भद्रपुर बजारमा उद्योगी प्रदीप सरावगीले सञ्चालन गर्दै आएको सूर्य प्लाई फ्याक्ट्रीमा गएराति करिब १२:२० बजेको समयमा अचानक आगलागी भएको हो।
आगलागी हुनासाथ स्थानीयवासीले सीमा सुरक्षा गुल्म हेडक्वार्टर भद्रपुरमा खबर गरेपछि सुरक्षाकर्मी, नगर प्रहरी र स्थानीयको टोली तत्काल उद्धारमा खटिएको थियो। सशस्त्र प्रहरी नायब उपरीक्षक विजय थापाको कमान्डमा खटिएका १० जना सशस्त्र प्रहरी, वडा प्रहरी कार्यालय भद्रपुरबाट प्रहरी सहायक निरीक्षक सञ्जीव चौधरीको कमान्डमा पुगेका ५ जना जनपद प्रहरी, भद्रपुर तथा बिर्तामोड नगरपालिकाका दमकल र करिब ५० देखि ६० जना स्थानीयवासीको अथक प्रयासमा आगो नियन्त्रणमा ल्याइएको थियो।
विद्युत् सर्ट भएर आगलागी भएको हुनसक्ने प्रारम्भिक अनुमान गरिएको उक्त दुर्घटनामा उद्योगभित्र रहेका बहुमूल्य मेसिनहरू तथा तयारी एवम् कच्चा प्लाइउड पूर्ण रूपमा जलेर नष्ट भएका छन्। प्रारम्भिक विवरणअनुसार आगलागीबाट करिब १ करोड ७० लाख रुपैयाँ बराबरको धनमाल स्वाहा भएको अनुमान गरिएको छ भने घटनाको वास्तविक क्षति र कारणबारे थप अनुसन्धान जारी रहेको प्रहरीले जनाएको छ।
