झापामा थप एक जनामा कोरोना संक्रमण पुष्टि भएको छ । कचनकवल गाउँपालिका –६ बनियानी बस्ने २३ वर्षीय पुरुषमा कोरोना सङ्क्रमणको पुष्टि भएको जिल्ला जनस्वास्थ्य कार्यालय झापाका फोकल पर्सन जीवन चौलागाईले जानकारी दिए । योसँगै झापामा सङ्क्रमितको सङ्ख्या तीन पुगेको छ ।
यसअघि दमक र बाह्रदशीका पुरुषमा कोरोना संक्रमण देखिएको हो । त्यसमध्ये बाह्रदशीका पुरुष निको भइसकेको छ । कचनकवलमा कोरोना पुष्टि भएको पुरुष गत शनिवार भारतबाट फर्किएका हुन् । उनीसँगै त्यो दिन पाठामारी नाकाबाट ३३ जना प्रवेश गरेको हो । उनीहरूलाई त्यही दिन स्वास्थ्य परीक्षण गरी पथरिया र लक्ष्मी प्रसाद देवकोटा माविको क्वारेनटाइनमा राखिएको छ । उनीहरू भारतमा रेल चलेपछि घर फर्किएका हुन् ।
उनीहरू सबै जना दिल्ली र मुम्बईबाट काम गरेर फर्केका युवकहरू भएको कचनकवल गाउँपालिकाका अध्यक्ष अञ्जार आलमले जानकारी दिए । कोरोना पुष्टि भएका पुरुष मुम्बईबाट आएका हुन् । उनलाई पथरिया क्वारेन्टाइनमा राखिएको छ । उनको स्वाब कोसी अञ्चल अस्पताल विराटनगर पीसीआर परीक्षणका लागि पठाएकोमा रिपोर्ट पोजेटिभ आएको फोकल पर्सन चौलागाईले बताए । स्वास्थ्य मन्त्रालयले भने आधिकारी जानकारी गर्न बाँकी रहेको उनको भनाई छ । ‘उनीसहित ३३ जनाको स्वाब पीसीआरका लागि पठाएको हो,’ उनले भने, ‘त्यसमध्ये १० जनाको रिपोर्ट आएको मध्ये एक जनामा पोजेटिभ देखिएको हो ।’
२३ जनाको रिपोर्ट आउन बाँकी रहेको उनको भनाई छ । अब कोरोना सङ्क्रमितलाई उपचारका लागि कोसी अस्पताल पठाइने उनले बताए । यता दक्षिणी झापाको कचनकवलबाट सयौँ सङ्ख्या नेपाली नागरिक भारतको विभिन्न राज्यमा रोजगारीका लागि गएका छन् । भारतमा कोरोना फैलिएपछि उनीहरू त्यहाँबाट स्वदेश फर्किन थालेका छन् । भारतबाट युवाहरू आउन थालेपछि कचनकवल कोरोनाको उच्च जोखिममा रहेको गाउँपालिका अध्यक्ष आलमले बताए । भारतबाट लुकिछिपी आउनु भन्दा सम्पर्क गरेर आउन उनले सबैमा आग्रह गरेका छन् ।साभार टाइम्स अफ प्रदेशबाट
