काठमाडौं। नेपाली कांग्रेसका सभापति गगनकुमार थापाले पार्टीभित्र विधि, विधान र लोकतान्त्रिक प्रक्रियाको पुनर्स्थापनामा हार्दिक अपील गर्दै सबै सदस्य, शुभेच्छुक र आम जनसमुदायलाई एकताबद्ध भएर अघि बढ्न आग्रह गरेका छन्।
थापाले विशेष महाधिवेशनलाई विवादको विषय नभई संविधान, प्रचलित कानून र पार्टीको विधान अनुसार निर्वाचन आयोगले निर्णय गरेको भन्दै त्यसप्रति आभार व्यक्त गरेका छन्। उनले भने, “यो नेपाली कांग्रेसका सदस्य र शुभेच्छुकहरूले पार्टीमा सार्थक परिवर्तन र देशको समुन्नतिका लागि गरेको इमान्दार प्रयासको साझा प्रतिफल हो। अब नेपाली कांग्रेस आफ्नो मूल मूल्य, मान्यता र आदर्शतर्फ फर्केको छ।”
सभापति थापाले सबै पार्टी कार्यकर्तालाई संयम, जिम्मेवारी र विश्वाससाथ अघि बढ्न आह्वान गर्दै भनिन्, “विशेष महाधिवेशनमा सहभागी वा नहुँने, सहमत वा असहमत सबै पार्टीभित्र एकताको मूल आधारमा रहेर अघि बढौं। अब कांग्रेस नवीन उर्जा र एकतासहित रुपान्तरणको दिशामा अघि बढेको छ। रिफर्मको यात्रा शुरु भइसकेको छ।”
थापाले पार्टीको अग्रज तथा विभिन्न तहका नेता र निकायको सहयोगलाई उल्लेख गर्दै पार्टीमा अब गुटगत भागबन्डा नभइ जिम्मेवारीको स्पष्ट विभाजन हुने बताएका छन्। उनले आम सदस्य र केन्द्रको समान हैसियतमा निर्णय प्रक्रियामा सहभागिता रहने कुरा सुनिश्चित गरेका छन्।
नेपाली कांग्रेसले विगतका कमजोरीप्रति आत्म–आलोचना गर्दै उपलब्धिलाई थप संस्थागत गर्ने संकल्प लिएको उल्लेख गर्दै थापाले भने, “अब कांग्रेसले मूल्य र सिद्धान्त विपरित सम्झौता नगर्नेछ र सत्ताका लागि अप्राकृतिक गठबन्धन अन्त्य हुनेछ। लोकतन्त्र र जनअधिकारको रक्षा गर्दै समुन्नतिको नेतृत्व गर्ने हाम्रो प्रतिबद्धता छ।”
सभापति थापाले अन्ततः सम्पूर्ण शहिद, पार्टीका अग्रज, नवयुवा र आम नेपालीजनप्रति श्रद्धान्जली अर्पण गर्दै समुन्नत नेपाल निर्माणको यात्रामा सहभागी हुन पुनः अपील गरेका छन्।
