आजको कविता  : “जागौ युवा अब “

मातृत्वको लडाईमा
माटोको कसम खाएर
आमाको अस्तित्व जोगाउन
वीर पुर्खाको
रगतको निशानी
निधारमा टीका
लगाउदै अब
शिरमाथि आमाको
आशिर्वाद लिएर
जागौ युवा अब।

सीमा रक्षार्थ खटिन
वीर पुर्खाको रगत
नसा नसामा बगाउदै
माटोले मागे
बलिदानीको फाँसी
चढ्न तयार हुँदै
जागौ युवा अब ।

हाम्रो माटोमाथि
धावा बोल्नेहरुका लागि
खुकुरी, तरबार र खुँडा
उत्रने छन् प्रतिकारमा
खबरदार वैरीहरु
अगाडि नबढ
जागौ युवा अब ।

अर्काको भूमिमा
आँखा गाड्दै
छलकपट गर्दै
बेमौसमी बाजा झैँ
बज्न खोज्नेलाई
भस्म पार्दै जलाउन
जागौ युवा अब ।

वीर नेपालीको
शीर उच्च बनाउन
नेपाली वीरता
विश्वभरी फैलाउन
माटो देश हो
देश माटो हो
यसको रक्षार्थ
जागौ युवा अब।

– बिना रोका ,घोराही , दाङ्ग