अर्जुनधारा–३ जुकेखाडीको भानु प्राथमिक बिद्यालयमा कक्षा–४ मा अध्ययनरत ११ बर्षिया नेहा धमला विकको मृगौला खराव भएको भन्दै परिवारले उपचारमा सहयोग गरिदिन अपिल गरेको छ ।
आर्थिक अवस्था एकदमै नाजुक भएकी नेहाकी आमा ताराले सहयोगका लागि बिर्तामोडस्थित गंगामाया तथा नरवहादुर बस्नेत क्यान्सर पीडित सहयोग संस्था समक्ष अभियान सञ्चालन गरिदिन आग्रह गरेकी हुन् ।
४l५ बर्षदेखि विरामी भएपनि आर्थिक अवस्था कमजोर भएका कारण सामान्य उपचार गरेको र अहिले समस्या ठूलो भएपछि सहयोगको खोजीमा रहेको उनले बताइन् । ‘आर्थिककै कारण राम्रो अस्पतालमा लगरे परिक्षण गर्नसम्म नसकेको उनले गुनासो सुनाइन् ।
संस्थाका अध्यक्ष भूपाल बस्नेतलले उनलाई अभियानमा सहजीकरण गरेर आर्थिक संकलनमा सहयोग पुर्याउने मंगलवार बिर्तामोडमा पत्रकार भेटघाट गर्दै जानकारी दिए । उनले २०७४ सालमा स्थापना भएको संस्थाले एकसय २५ जनालाई सहयोग गरिसकेको जानकारी दिए । उनले चाँडै संस्थाले अर्जुनधारा र बिर्तामोड नगरपालिकामा नेहा बचाउ अभियान सञ्चालन गर्ने बताए ।
