राजवंशी भाषिक कविता: “जात्रार सोदोर”
मोक जुल्पी,फेर ? .. किन्वाए लागे
खास्ता, निम्की फेर ..किन्वाए लागे।
जात्रा पाब्नी त .. उझाँईचे रे जोर ,
मुई हईचु फेर, .. काँहार घरेर सोदोर ??
ससुर अन्छाँए .. बेटी जुवा करे
दँकानी अन्छाँए .. छुवार नुआ करे।
बार्ह नाँक्सा काप्रात ..काँटिए रे डोर,
मुई हईचु फेर .. काहाँर घरेर सोदोर??
जात्रा हले गाँरीघरा .. किँन्वा लागे,
संस्कार कहचे साँरी .. पिन्हुवा लागे।
मोर फेशन देख्वार ती .. लागिल जोर
मुई हईचु फेर .. काँहार घरेर सोदोर??
निजहातेर सिर्जनाते .. कोए मोर जात्रा
दहीर हाँन्डीलाअ् .. गुवालेर घरेर मात्रा।
खेतीपाती लाँएसे .. किखान हबे रे मोर?
ताँह मुई त साँजिचु .. जात्रारे सोदोर ।।
सिर्जुवा निपानु मुई .. हातेर सिर्जन्ला,
बेनुवा निजान्नु मुई .. मिठा पकवाँन्ला ।
पोरेर सामान्ला देखाए ..घर कर्चु रे खोकोर
ताँह त हईचु मुई फेर .. जात्रारे सोदोर ।।
साँकाए राख्मु कहचु .. पहिचानेर माँटी
घरत नाँई कोए मोर ..धक्रा आर फाँटी।
ढाँस्ना ,सोफाए बिछाए ..कर्नु रे ओन्ढोर
ताँह मुई त हईचु .. फेर जात्रारे सोदोर ।।
जोगेन्द्र प्रसाद राजवंशी
कचनकवल :-३, दल्की झापा
हाल :- मलेशिया
