झापा, जेठ ७ । झापाको कनकाई नगरपालिका वडा नम्बर ८, लक्ष्मिपुरस्थित एक घरमा अनलाइन सट्टाबाजी (जुवा) सञ्चालन भइरहेको भन्ने विशेष सूचनाका आधारमा इलाका प्रहरी कार्यालय अनारमनीबाट खटिएको टोलीले दुई महिलालाई पक्राउ गरेको छ।
प्रहरी निरीक्षक सन्तोष राईको कमाण्डमा गएको टोलीले ४१ वर्षीया इन्दिरा प्रसाई र उनकी २१ वर्षीया छोरी सिम्रन प्रसाईलाई नियन्त्रणमा लिएको हो। उनीहरूको साथबाट ५ थान मोबाइल फोन, २ थान ट्याब्लेट र १ थान ल्यापटप बरामद गरिएको प्रहरीले जनाएको छ।
निजहरुलाई नियन्त्रणमा लिएर थप अनुसन्धानका लागि इलाका प्रहरी कार्यालय अनारमनीमा राखिएको छ। प्रारम्भिक अनुसन्धानपछि उनीहरूलाई सम्मानित झापा जिल्ला अदालतमा उपस्थित गराई ४ दिनको म्याद थप गरी हिरासतमा राखिएको र अनुसन्धान जारी रहेको प्रहरीले जानकारी दिएको छ।
