काठमाडौं ।बालुवाटारको सरकारी जग्गा प्रकरणमा मुछिएका भाटभटेनी डिपार्टमेन्ट स्टोरका मालिक मिनबहादुर गुरुङलाई सरकारले विभूषित गरेको छ । बालुवाटारका सरकारी जग्गा कीर्ते गरी बेचबिखन गरेको आरोपमा उनीविरुद्ध परेको मुद्दा विशेष अदालतमा विचाराधिन छ ।
अख्तियार दुरुपयोग अनुसन्धान आयोगले उनीहरुविरुद्ध अदालतले मुद्दा दायर गरेको छ । आयोगले विशेष अदालतमा दायर गरेको आरोपपत्रअनुसार बालुवाटारको सरकारी जग्गाको गैरकानुनी किनबेचमा व्यवसायी गुरुङसँगै उनको छोरो कल्याण गुरुङ‚ छोरी तथा सहोदर भाइ र बुहारीसमेतको संलग्नता रहेको दाबी गरेको छ ।
अख्तियारका अनुसार गुरुङले बालुवाटारस्थित ललिता निवासभित्र रहेका जग्गा ८ जनालाई बिक्री गरेका थिए। जग्गा खरिद गरेका व्यक्तिहरु अभिताम्भ तुलाधर, नुतन श्रेष्ठ, डिम्पल वंशल, सरिता मानन्धर, नीतु गुरुङ, प्रविण ताम्राकार, भारती पाण्डे र अच्युतराज श्रेष्ठले गुरुङबाट बालुवाटारमा जग्गा किनेको बयान दिइसकेका छन् ।
यस्तै अख्तियारलाई भाटभटेनीका मालिक गुरुङले भाटभटेनी डिपार्टमेन्ट स्टोरका नाममा बालुवाटारमा ४ र ५ कित्ता जग्गाहरु विभिन्न व्यक्तिबाट खरिद गरेको बयान दिएका थिए । उनले केही कित्ता जग्गा प्रधानमन्त्री निवास विस्तारका क्रममा मन्त्रिपरिषदको निर्णयबाट सट्टा भर्नाबाट आएको बयान दिएको अख्तियारले यस अघि बताइसकेको छ ।
यसरी सरकारी जग्गा कीर्ते गरी बेचबिखन गरेको आरोपमा दायर भएको मुद्दा अदालतमा विचाराधीन रहेको अवस्थामा सरकारले गुरुङलाई ‘सुप्रवल जनसेवा श्री’द्वारा विभूषित गरेको हो ।
सरकारले उनलाई दिएको ‘विभूषण अधिकारपत्र’मा लेखिएको छ, ‘नेपाल राष्ट्रको गौरव एंव नेपाली जनताको हित अभिवृद्धिमा तपाईंबाट भएको उल्लेखनीय योगदानको सम्मान स्वरुप ‘जनसेवा श्री’द्वारा विभूषित गरिएको छ । मानपदवीको गरिमा अक्षुण्ण राख्दै नेपाल र नेपाली जनताको गौरव एंव श्रीवृद्धिमा तपाईंलाई थप सफलता प्राप्त हुनेछ ।’
उक्त पदमा प्रधानमन्त्री केपी शर्मा ओली र विभूषण समितिका अध्यक्षसमेत रहेका उपप्रधान तथा रक्षामन्त्री ईश्वर पोखरेलले हस्ताक्षर गरेका छन् ।क्यानाडा नेपालबाट
