बुद्धशान्ति, झापा — राष्ट्रिय स्वतन्त्र पार्टी (रास्वपा) बुद्धशान्ति गाउँ समितिले भिजिट भिसाको नाममा भइरहेको दुरुपयोग, मानव तस्करी र सत्तासीन शक्तिहरूको संलग्नताप्रति गम्भीर आपत्ति जनाउँदै ज्ञापनपत्रमार्फत औपचारिक चेतावनी दिएको छ।
आज बुद्धशान्ति गाउँपालिका अध्यक्ष मनोज प्रसाईं र उपाध्यक्ष भवानी खतिवडालाई बुझाइएको सो ज्ञापनपत्रमार्फत रास्वपाले भन्यो — “समस्याको जरो स्थानीय तहमै छ। समाधान पनि त्यहीँबाट सुरु हुनुपर्छ।”
रास्वपा बुद्धशान्तिका सभापति दीपक भट्टराईका अनुसार, “भिजिट भिसाको नाममा भइरहेको मानव तस्करी कुनै संयोग होइन। यो राज्य संयन्त्रको लापरवाही र सत्तासीन संरचनाको संरक्षणमा सञ्चालित आपराधिक मिलेमतो हो। स्थानीय सरकार हाम्रो आवाजको प्रारम्भिक माध्यम हो र यताबाट सुरु भएको दबाबले केन्द्रसम्म प्रभाव पार्नेछ।”
ज्ञापनपत्रमा तीन तहका राज्य संयन्त्रबीचको लापरवाही, गैरजिम्मेवारी र मौन सहमतिलाई लक्ष्य गर्दै भनेको छ — “यी समस्याहरू समाधान नगरी मानव तस्करी रोकिन्न, न त जनविश्वास पुनःस्थापित हुन्छ।”
रास्वपा उपसभापति कृष्ण ढकालले भने, “हामी चुप लाग्नेवाला छैनौं। अन्याय जहाँ हुन्छ, प्रतिरोध त्यहीँ जरुरी हुन्छ। दोषी जहाँ छन्, तिनीहरू उजागर गरिन्छन् — गरिनुपर्छ।”
उनले स्थानीय तहमा मौन सहमतिमा क्रियाशील मानव तस्करी एजेन्टहरूलाई कानुनी कारबाहीको दायरामा ल्याउन माग दोहोर्याए।
ज्ञापनपत्रमा उल्लेख गरिएको छ — “दोषीमाथि कारबाही गर, पीडितको संरक्षण गर!” भन्ने सन्देश स्थानीयदेखि केन्द्रसम्म पुर्याइएको छ।
ज्ञापनपत्र बुझाउने क्रममा बुद्धशान्तिका सबै वडाका सभापति, रास्वपाका पदाधिकारी तथा सदस्यहरूको उल्लेखनीय उपस्थिति रहेको थियो।
