काठमाडौं । नेपाली कांग्रेसले आगामी माघ ११ गते हुने राष्ट्रिय सभाको निर्वाचनमा नेकपा एमाले र नेपाली कम्युनिष्ट पार्टीसँग तालमेल गर्ने निर्णय गरेको छ।
नेपाली कांग्रेसको मुख्यालय सानेपामा जारी केन्द्रीय कार्य सम्पादन समितिको बैठकमा १८ सिटमध्ये आठ सिट आफूले लिने र बाँकी सिटहरूको लागि उक्त दलसँग तालमेल गर्ने विषयमा छलफल गरिएको हो।
नेपाली कांग्रेसका संसदीय दलका नेता कृष्णप्रसाद सिटौलाले सोमबार संचारकर्मीहरूसँग कुरा गर्दै आगामी राष्ट्रिय सभाको निर्वाचनमा अन्य दलसँग रणनीतिक तालमेल गर्ने कुरा पुष्टि गरे। उनले भने, “अंकगणितको कारणले अन्य दलसँग तालमेल गर्नु पर्ने बाध्यतात्मक अवस्था रहेको छ।”
सिटौलाले प्रतिनिधि सभाको चुनावमा भने कुनै गठबन्धन नहुने जनाए। आगामी राष्ट्रिय सभा सदस्यहरूको कार्यकाल फागुन २० मा सकिँदैछ र रिक्त हुने १९ सदस्यमध्ये १८ का लागि निर्वाचन माघ ११ मा हुनेछ।
यस निर्वाचनमा कोशी प्रदेशबाट ३, मधेश प्रदेशबाट ४, बागमती र गण्डकी प्रदेशबाट २-२ जना, लुम्बिनी प्रदेशबाट ३, कर्णाली र सुदूरपश्चिम प्रदेशबाट २-२ जना राष्ट्रिय सभा सदस्यका लागि निर्वाचन हुनेछ।
