काठमाडौँ, १४ साउन ।पूर्वराजा ज्ञानेन्द्र शाहले संयम रहन र आपसी सद्भाव कायम राख्न सबै नेपालीहरूलाई आग्रह गरेका छन्। सुनसरी लगायतका जिल्लाहरूमा हालै भएका द्वन्द्वप्रति गहिरो दु:ख व्यक्त गर्दै उनले सामाजिक सद्भाव कायम राख्न अपिल गरेका हुन्।
निर्मल निवासस्थित संवाद सचिवालयमार्फत जारी सन्देशमा सुनसरीमा भएको आपसी द्वन्द्वका कारण जनधनको क्षति भएको र त्यसको असर कोशी क्षेत्र तथा तराईका विभिन्न भागमा फैलिएकोमा पूर्वराजा ज्ञानेन्द्रले चिन्ता व्यक्त गरेका छन्।
नेपाल बहुजातीय, बहुभाषिक र बहुसांस्कृतिक विशेषता भएको देश भएको उल्लेख गर्दै उनले भनेका छन्— “यही विविधता नै हाम्रो देशको गौरव तथा पहिचान हो। यसमा कसैले पनि खलल पार्नु हुँदैन।”
देशको मौलिक मान्यताविपरीत यस्ता अवाञ्छित घटनाहरू हुनु चिन्ताको विषय भएको सन्देशमा उल्लेख छ। “यो हाम्रो मौलिक मूल्य र मान्यता विपरीतको विषय हो,” पूर्वराजा ज्ञानेन्द्रले भनेका छन्, “त्यसैले जुनसुकै भूभागमा रहे-बसेका जो कोही पनि हामी नेपाली मिलौँ, हाम्रो यही आग्रह छ।”
