झापा । झापा गाउँपालिकाले आफ्नै भूमि व्यवस्थापन शाखामार्फत मालपोत तथा नापी सम्बन्धी सेवाहरू औपचारिक रूपमा सञ्चालनमा ल्याएको छ।
गाउँपालिकाकी कार्यवाहक अध्यक्ष अन्जुदेवी थपलियाको अध्यक्षतामा सोमबार आयोजित विशेष कार्यक्रमका बीच उक्त सेवाको शुभारम्भ गरिएको हो। कार्यक्रममा कार्यवाहक अध्यक्ष थपलियाले गाउँपालिकाबाटै भूमि प्रशासन सेवा सञ्चालनमा आएको घोषणा गरेकी हुन्।
पहिलो चरणमा जग्गाधनी प्रमाण पुर्जामा विद्युतीय फोटो, औंठाछाप, दस्तखत तथा ल्याण्ड ओनर आइडेन्टिफिकेसन नम्बर (LIN) कायम भएका जग्गाको खरिदबिक्री, राजीनामा, हकछोड र लिखत पारित सम्बन्धी कामहरू सञ्चालन हुनेछन्। यसका अतिरिक्त अंशवण्डा, नामसारी, मोही बाँडफाँड, कित्ताकाट, नक्सा प्रिन्ट, अद्यावधिक तथा राजस्व संकलन जस्ता सेवाहरू समेत गाउँपालिका स्तरबाटै प्रवाह गरिनेछ।
स्थानीय तहबाटै मालपोत र नापी सम्बन्धी सेवा उपलब्ध भएपछि नागरिकहरूलाई साविकको कार्यालय धाउनुपर्ने झन्झटबाट मुक्ति मिल्नेछ। पालिकाबाटै सेवा विस्तार गरिएपछि स्थानीय बासिन्दाले छिटो र छरितो रूपमा सेवा पाउने प्रमुख प्रशासकीय अधिकृत जनार्दन निरौला बताउँछन्।
