झापा, २६ साउन। झापाको कमल गाउँपालिकाका अध्यक्ष हुकुमसिंह राईले आवश्यक मापदण्ड पूरा भए मात्र कमल गाउँपालिका छुट्टै नगरपालिकामा स्तरोन्नति हुन सक्ने स्पष्ट पारेका छन्।
गाउँपालिकाको स्थानीय तहको पुनर्संरचना तथा स्वरूप परिवर्तनलाई लिएर बजारमा फैलाइएका विभिन्न हल्ला तथा काल्पनिक प्रचारप्रति विश्वास नगर्न आग्रह गर्दै उनले आधिकारिक मापदण्ड र प्रक्रियाबिना कुनै निर्णय नहुने बताएका हुन्।
अध्यक्ष राईले सामाजिक सञ्जालमार्फत आफ्नो धारणा सार्वजनिक गर्दै कमल गाउँपालिकाले तोकिएको मापदण्ड पूरा गरे मात्र नगरपालिका बन्न सक्ने र मापदण्ड नपुगे हालकै गाउँपालिकाको संरचनामा कायमै रहने उल्लेख गरेका छन्।
”कमल गाउँपालिका मापदण्ड पूरा भएपछि छुट्टै कमल नगरपालिका बन्न सक्छ। मापदण्ड पूरा नभएसम्म गाउँपालिका नै रहनेछ,” राईले भनेका छन्, “निराधार र काल्पनिक हल्लाको पछि नलाग्न सबैमा अनुरोध गर्दछु।”
स्थानीय तहको नाम, सीमा वा स्वरूप परिवर्तनसम्बन्धी विषयमा कुनै पनि आधिकारिक निर्णय वा कानुनी प्रक्रिया अघि नबढेको भन्दै अध्यक्ष राईले सर्वसाधारणलाई अनावश्यक भ्रममा नपर्न र सचेत रहन आग्रह गरेका छन्।
