अफ्रिकी मुलुक काङ्गोमा इबोला भाइरसको प्रकोप झनै भयानक बन्दै गएको छ। काङ्गोमा इबोला सङ्क्रमितको सङ्ख्या ६ हजार नाघेको छ भने यस रोगका कारण हालसम्म २ हजार ९११ जनाको मृत्यु भइसकेको छ।
अधिकारीहरूका अनुसार सङ्क्रमितमध्ये १ हजार ३६० भन्दा बढी मानिस निको भएका छन्, जसलाई एक ‘उत्साहजनक’ खबर मानिएको छ। विश्व स्वास्थ्य सङ्गठन (डब्लुएचओ) ले यो प्रकोप अझै पनि नियन्त्रणबाहिर रहेको र सन् २०१४-२०१६ मा पश्चिम अफ्रिकामा फैलिएको इबोला प्रकोपभन्दा पनि भयावह हुन सक्ने चेतावनी दिएको छ। त्यो समयमा गिनी, लाइबेरिया र सिएरा लियोनमा ११ हजारभन्दा बढी मानिसको मृत्यु भएको थियो, जुन इतिहासकै सबैभन्दा घातक प्रकोप मानिन्छ।
बढ्दो जोखिमलाई ध्यानमा राख्दै काङ्गो सरकारले गत सातादेखि अग्रपङ्क्तिमा खटिने स्वास्थ्यकर्मी तथा अन्य कर्मचारीहरूलाई ‘अर्भिबो’ खोप दिन सुरु गरेको छ। जायरे प्रजातिको भाइरसबाट फैलिएका अघिल्ला प्रकोपहरूमा यो खोप प्रभावकारी सिद्ध भइसकेको छ।
यसैबिच, छिमेकी मुलुक युगान्डाले गत महिना आफूलाई इबोलामुक्त घोषणा गरे तापनि सीमापार सङ्क्रमण फैलिने जोखिम अझै कायम रहेको डब्लुएचओले स्पष्ट पारेको छ।
