झापा । झापा जिल्लाको बुद्धशान्ति गाउँपालिका वडा नं. २ का वडाध्यक्ष डिल्लीप्रसाद ओलीलाई ८० हजार रुपैयाँ घुस लिँदै गर्दा अख्तियार दुरुपयोग अनुसन्धान आयोगले नियन्त्रणमा लिएको छ। उनी भारतीय नागरिक अमरनाथ चौहानसँग घरको बाटो तथा जग्गा पासका लागि घुस लिँदै गरेको अवस्थामा पक्राउ परेका हुन्। पक्राउ परेपछि वडाध्यक्ष ओलीलाई इटहरीमा रहेको अख्तियारको कार्यालयमा अनुसन्धानका लागि लगिएको छ।
घटना मंगलबार दिउँसो बिर्तामोडको हनुमान कम्प्लेक्स अगाडि भएको थियो, जहाँ ओलीले चौहानसँग लेनदेनको लागि घुस लिएका थिए। अख्तियारको टोलीले राति ९ बजेसम्म इलाका प्रहरी कार्यालय बिर्तामोडमा सर्जमिन मुचुल्का बनाएको थियो।
वडाध्यक्ष ओली नेपाली कांग्रेस बुद्धशान्ति–२ का वडा सभापति हुन्, र उनीमाथि पार्टीले हालसम्म औपचारिक कारबाही अघि नबढाएको बताइएको छ। यद्यपि, उनलाई निलम्बनमा राखिएको छ र जिल्ला समितिको बैठकपछि पार्टीले आवश्यक कारबाही गर्ने क्षेत्रीय सभापति खगेन्द्र मैनालीले जनाएका छन्।
घुस प्रकरणको अनुसन्धान चलिरहँदा, बुद्धशान्ति गाउँपालिकाले वडाध्यक्षको अनुपस्थितिमा कार्यवाहक कसलाई दिने भन्ने विषयमा कानुनी परामर्श गरिरहेको छ।
