सुनसरी, २०८१ कार्तिक २६ गते । सुनसरीको धरान उपमहानगरपालिका वडा नं. ८ र ९ मा नियन्त्रित र प्रतिबन्धित औषधी सहित ६ जनालाई प्रहरीले पक्राउ गरेको छ। हिजो राति करीब ११ बजे अस्थाई प्रहरी पोष्ट तिनकुने धरानबाट खटिएको टोलीले सेउती पुल नजिक सुनसरी धरान १५ का २४ वर्षीय मौषम लिम्बु, २३ वर्षीया सृजना राई र २५ वर्षीया निशा श्रेष्ठलाई स्कुटरमा सवार रहँदा २ सय क्याप्सुल ट्रामानिल र २ सय ट्याब्लेट स्पास्पेन सहित पक्राउ गरेको हो।
पक्राउ परेका व्यक्तिहरूको अनुसन्धानको क्रममा इलाका प्रहरी कार्यालय धरानबाट थप खटिएको टोलीले सिरहा चन्द्रअयोध्यापुर घर भएका तर धरान ९ दौलत थुलुङको घरमा डेरा गरि बस्ने २३ वर्षीय अंकित कुमार सिंह, धरान ८ का २० वर्षीय साइमन राई, र २३ वर्षीय सागर श्रेष्ठलाई ९ हजार ३ सय क्याप्सुल ट्रामानिल र ६ हजार ६ सय २७ ट्याब्लेट स्पास्पेन सहित पक्राउ गरेको छ। घटनाबारे थप अनुसन्धान इलाका प्रहरी कार्यालय धरानमा भइरहेको छ।
