इलामको माई नगरपालिका-२ स्थित हेप्पी ड्रिम्स चेप्टी पार्कमा अतिक्रमण गरिएको वन क्षेत्रबाट निर्माण गरिएका संरचनाहरू हटाइएका छन्। उच्च अदालत इलामको आदेशपछि डिभिजन वन कार्यालयले पार्कको १७७ रोपनी अतिक्रमित भूमि फिर्ता ल्याउँदै ४१ रोपनी भूमि मात्रै पार्कका संचालकको स्वामित्वमा राख्ने निर्णय गरेको हो।
अख्तियार दुरुपयोग अनुसन्धान आयोगको निर्देशन अनुसार, २०७८ फागुनदेखि वन क्षेत्रको छानबिन र संरक्षण प्रक्रिया सुरु भएको थियो। पार्कका संचालक दिनेश शिवाकोटीको स्वामित्वमा रहेको संरचनाहरू हटाउने कार्य डिभिजन वन कार्यालयले सम्पन्न गरेको छ। ४१ रोपनी बाहेक अन्य भूमि मापदण्डअनुसार स्वामित्वको प्रमाण प्रस्तुत गर्न नसक्दा संरचनाहरू हटाइएका हुन्।
डिभिजन वन अधिकृत दानबहादुर श्रेष्ठले पत्रकार सम्मेलनमा जानकारी दिँदै भने, “पार्कको संरचना हटाएर अब वन क्षेत्रको संरक्षण र रेखदेखमा ध्यान दिइनेछ।”
