काठमाडौँ ।दिग्गज फूटबलर क्रिस्टियानो रोनाल्डो भारत आउने छैनन्। रोनाल्डोका प्रशंसकहरू उनलाई भारतमा खेलिरहेको हेर्न उत्सुक थिए, तर यसपालि त्यो सम्भव हुने छैन।
साउदी अरबको शीर्ष क्लब अल नस्रको टिम एएफसी च्याम्पियन्स लिग–२ को म्याच खेल्नका लागि सोमबार भारत आइपुगेको छ। तर ४० वर्षीय रोनाल्डो २२ अक्टोबरमा हुने म्याचमा मैदानमा देखिने छैनन्।
साउदीको खेल समाचारपत्र अल रियादिया का अनुसार, एफसी गोवा व्यवस्थापनले बारम्बार अनुरोध गरे पनि रोनाल्डोलाई टोलीमा सामेल गराइएन।
एफसी गोवाले गत चरणमा एएफसी कप विजेता अल सीब लाई हराउँदै प्रतियोगिताको दोस्रो चरणमा स्थान सुरक्षित गरेको हो। ग्रुप ‘डी’ मा गोवासँगै अल नस्र पनि समावेश छ।
रोनाल्डो पछिल्ला केही वर्षदेखि साउदी अरबको यो क्लबबाट खेल्दै आएका छन् र उनी आगामी फिफा विश्वकप खेल्ने इच्छामा छन्। यही कारणले उनी अहिले आफ्नो कार्यभार व्यवस्थापनमा विशेष ध्यान दिइरहेका छन्।
एफसी गोवाविरुद्धको खेलपछि अल नस्रले २८ अक्टोबरमा किंग्स कपको प्रि–क्वार्टर फाइनलमा अल इत्तिहादविरुद्ध प्रतिस्पर्धा गर्नेछ।
