धरान l सरकारले पछिल्लो पटक लकडाउन थपेर बैशाख २५ गते सम्म पु¥याए संगै सुनसरी उद्योग वाणिज्य संघ धरानमा लकडाउन लचिलो गर्दै खाद्यान्नका पसलहरु खुलागर्ने तयारीमा लागेको छ । यसबारे आइतवार धरान उपमहानगरपालिका, इलाका प्रहरी र संघका पदाधिकारी विच छलफल भएको उबासंघले जनाएको छ ।
धरानमा खाद्यान्नको पसलहरुको व्यवस्थापन गर्ने विषयमा छलफल भएको हो । लकडाउन अवधि बढेर महिना दिन बढी भैसकेको अवस्थामा खाद्यवस्तु किनेर खानेहरुका लागि पनि समस्या भएपछि खाद्यवस्तुको पसलहरु खुला गर्ने व्यवस्थाका बारेमा छलफल गर्न संघले उक्त संयुक्त बैठक आयोजना गरेको बताइएको छ ।
संघका अध्यक्ष गिरिधारी सापकोटाका अनुसार छलफल बाट उपमहानगरपालिकाले वडाहरुमा खाद्यान्न पसलहरु खोल्ने विषयमा वडाध्यक्षहरु संग छलफल गरी वडामा टोलहरु लाई पायक पर्नेगरी खुला गर्न सकिनेका पसलहरुको सूची तयार गर्ने भएको छ । पसलहरुको उक्त विवरण प्राप्त भएपछि पुनः छलफल गरि पसलहरु खुला गर्ने टुंगो लगाइने उनले बताए ।
छलफलमा संघ व्दारा गठिन बजार अनुगमन तथा आपूर्ति समन्वय समितिका संयोजक शिवराज श्रेष्ठले धरानको वडा ४, ५, ६ र २० मा खाद्यान्नको अभाव भएको बताए । उक्त वडाहरुमा खाद्यान्न सहज गर्न आपूर्तिका लागि समन्वय गर्दै केही पसल खोलिने भएको छ । खोलिने पसलहरुमा अनिवार्य सामाजिक दुरी कायम गर्दै पसलेले ग्लोब्स र मास्क लगाउनु पर्ने बताए ।
उपभोग्य वस्तुको मुल्यमा एक रुपता नपाइएकाले विवाद आएकाले खुला गरिएको पसलहरुले मूल्य सूचि अनिवार्य रुपमा राख्नुपर्ने बताए । संघका सदस्य विष्णु बरालका अनुसार छलफलमा धरान उपमहानगरपालिका मेयर तिलक राईले हाल विद्यमान प्रतिकुल अवस्थामा व्यवसायीहरु लाई व्यापार गर्नभन्दा पनि सेवामूलक भावले कार्य गर्न अनुरोध गरे । उनले भने ‘प्रतिकुल अवस्था बढ्दै गए हामीले आहार–बिहार र बानी–व्यवहारमा पनि परिवर्तन गर्दै जानुपर्छ ।’ उपमयर मञ्जु भण्डारीले लकडाउनको अवस्थामा तरकारी बजारको व्यवस्थापनमा अन्य शहरहरुले धरानमा गरिएको व्यवस्थापन लाई मोडलको अनुकरण गरेको र खाद्यान्नको पसल खोल्नका लागि पनि मापन तयार गरिनुपर्ने बताइन् ।
छलफलमा नगरपालिकाका बजार अनुगमन अधिकृत वेद सापकोटा, संघका वाणिज्य सचिव सिताराम आचार्य, प्रचार सचिव मानबहादुर विश्वकर्मा, सदस्य नारायण लिम्बू लगायतले उपभोक्ता र साना पसलेहरुका हितका लागि व्यवस्थित रुपमा पसलहरु खुला गर्न उचित हुने धारणा राखे । छलफलमा इलाका प्रहरी कार्यालयका डिएसपी ढुण्डीराज न्यौपाने पनि सहभागी थिए ।
