बिर्तामोड । झापाको बिर्तामोड नगरपालिकाले शिक्षा क्षेत्रमा उल्लेखनीय योगदान पुर्याउने तीन जना शिक्षकलाई जनही ५० हजार रुपैयाँ नगद पुरस्कारसहित सम्मान गरेको छ । नगरभित्रका सामुदायिक तथा संस्थागत विद्यालयका शिक्षकहरूमध्ये कार्यसम्पादनका आधारमा उत्कृष्ट ठहरिएका उनीहरूलाई शुक्रबार आयोजित एक विशेष समारोहका बीच पुरस्कृत गरिएको हो । नगरपालिकाले विगत तीन वर्षदेखि शिक्षक र विद्यार्थीहरूको मनोबल उच्च राख्न यस्तो प्रोत्साहन कार्यक्रमलाई निरन्तरता दिँदै आएको छ ।
यस वर्ष पुरस्कृत हुने उत्कृष्ट शिक्षकहरूमा प्राथमिक तहबाट जनता आधारभूत विद्यालयकी सरिता खतिवडा, निम्न माध्यमिक तहबाट महेन्द्ररत्न माध्यमिक विद्यालयका विजय प्रकाश उप्रेती र माध्यमिक तहबाट सोही विद्यालयका लक्ष्मी प्रसाद प्रसाईं रहेका छन् । उनीहरूलाई नगद राशिका साथै प्रशंसापत्रद्वारा सम्मान गरिएको थियो ।
शिक्षकहरूसँगै नगरपालिकाले शैक्षिक सत्र २०८१ को आधारभूत शिक्षा परीक्षा (कक्षा ८) मा ४ जीपीए प्राप्त गर्ने १९ जना मेधावी विद्यार्थीहरूलाई पनि नगद पाँच हजार रुपैयाँ र प्रमाणपत्रसहित प्रोत्साहित गरेको छ । पुरस्कृत हुने विद्यार्थीहरूमा एमिटी माध्यमिक विद्यालयकी अर्पिता अधिकारी, लालीगुराँस इङ्लिस स्कुलकी आर्जु कार्की, लिटल फ्लावर्सका दृष्टि मित्तल, निश्चल शाह, प्रजिशा पोखरेल, प्रत्युस प्रसाईं, वैभव शर्मा र वेदांश शर्मा रहेका छन् । त्यसैगरी महेन्द्ररत्न माध्यमिक विद्यालयका पुजता सुवेदी, मोहनमाया माध्यमिक विद्यालयका आदित्य अर्याल, आयुशा निरौला, अजयबाबु श्रेष्ठ, अंकुश प्रधान, सलिना बाँस्कोटा र प्रतीक्षा ढकाल पनि पुरस्कृत भएका छन् ।
विद्यार्थी प्रोत्साहनकै क्रममा नवोदय फनमिनकी समिर कुमार यादव, न्यूटन्स एजुकेशनका कमल कुमार अधिकारी, निधि माध्यमिक विद्यालयकी युनिशा राजवंशी र तक्षशीला प्रोग्रेसिभकी जेशिका श्रेष्ठलाई पनि सम्मान गरिएको छ । साथै, यसअघिको कार्यक्रममा छुट्न पुगेकी एसईईमा उत्कृष्ट नतिजा ल्याउने मोहनमाया माध्यमिक विद्यालयकी विद्यार्थी केन्सिका गणेशलाई समेत सोही अवसरमा पुरस्कृत गरियो ।
कार्यक्रमको अर्को महत्त्वपूर्ण पक्ष सेवा निवृत्त शिक्षकहरूको बिदाइ र सम्मान थियो । लामो समय शिक्षा क्षेत्रमा अनवरत सेवा गरी निवृत्त भएका शान्ता चुडाल, वेदमाया खनाल, अम्बिका देवी दाहाल, राघव गड्तौला, यदुनाथ अधिकारी, देवी प्रसाद पोखरेल, यमनाथ प्रसाईं, जनार्दन मिश्र, अग्नि बहादुर दाहाल, यज्ञप्रताप अधिकारी र पद्मा पाण्डेलाई नगरपालिकाले दोसल्ला र सम्मानपत्रसहित बिदाइ गरेको छ ।
पुरस्कार वितरण समारोहलाई सम्बोधन गर्दै बिर्तामोड नगर प्रमुख पवित्रा देवी महतारा प्रसाईंले स्थानीय सरकार शिक्षाको गुणस्तर सुधार्न र यस क्षेत्रमा व्यापक परिवर्तन ल्याउन प्रतिबद्ध रहेको बताउनुभयो । उहाँले शिक्षकहरूको लगाव र विद्यार्थीहरूको मिहिनेतले नै नगरको शैक्षिक स्तर उकासिने विश्वास व्यक्त गर्दै यस्ता प्रोत्साहनमूलक कार्यक्रमलाई आगामी वर्षहरूमा पनि निरन्तरता दिने घोषणा गर्नुभयो । स्थानीय सरकारको नेतृत्वमा शैक्षिक सुधारका प्रयासहरू सुरु भएयता नगरको शिक्षा क्षेत्रमा सकारात्मक संकेतहरू देखिएको उहाँको दाबी थियो ।
कार्यक्रममा उत्कृष्ट शिक्षक छनोट समितिका संयोजक युवराज पाण्डे, नेपाल शिक्षक महासंघ बिर्तामोडका अध्यक्ष युवराज कँडेल, प्याब्सन बिर्तामोडका अध्यक्ष सुरेन्द्र खरेल लगायतले शुभकामना मन्तव्य राख्दै नगरपालिकाको यो कदमले शिक्षक र विद्यार्थीमा प्रतिस्पर्धात्मक भावना र जिम्मेवारी बोध गराएको धारणा राख्नुभयो । शिक्षा शाखाका उपसचिव तिलचन भण्डारीले कार्यक्रमको उद्देश्यमाथि प्रकाश पार्नुभएको थियो । हरेक वर्ष शिक्षा दिवसका अवसरमा गरिँदै आएको यो कार्यक्रम यसपटक विशेष परिस्थितिका कारण केही समय पछि आयोजना गरिएको नगरपालिकाले जनाएको छ ।
