बाह्रदशी, झापा । झापाको बाह्रदशी गाउँपालिकाले गाउँपालिकाको आन्तरिक अनुदानबाट कार्यरत १६ जना शिक्षकहरूलाई हटाउने निर्णय गरेको छ। गाउँपालिकाले नयाँ शैक्षिक सत्र २०८३ सालदेखि लागू हुने गरी ती शिक्षकहरूलाई सेवाबाट हटाउने निर्णय गरेको हो।
लामो समयदेखि गाउँपालिकाको आफ्नै स्रोत र अनुदानबाट विभिन्न सामुदायिक विद्यालयहरूमा कार्यरत रहेका ती शिक्षकहरूको म्याद थप नगर्ने पालिकाको पछिल्लो नीतिसँगै यो निर्णय आएको हो। गाउँपालिकाले शिक्षा क्षेत्रमा नयाँ योजना र व्यवस्थापनका साथ अघि बढ्न यो कदम चालेको बुझिएको छ।
यसअघि पालिकाले सामुदायिक विद्यालयको शैक्षिक गुणस्तर सुधार र शिक्षक दरबन्दी मिलानका विषयमा विभिन्न छलफलहरू चलाउँदै आएको थियो। अनुदानमा कार्यरत शिक्षकहरू हटाइएपछि रिक्त रहने स्थानमा नयाँ दरबन्दी मिलान वा अन्य वैकल्पिक व्यवस्थाका बारेमा भने पालिकाले स्पष्ट पारेको छैन।
एकैपटक ठूलो संख्यामा शिक्षकहरू हटाइएका कारण सम्बन्धित विद्यालयहरूको पठनपाठनमा पर्न सक्ने असर र विकल्पका बारेमा स्थानीय स्तरमा चासोका साथ हेरिएको छ। यद्यपि, पालिकाले प्रशासनिक र आर्थिक व्यवस्थापनलाई चुस्त बनाउन यो निर्णय लिएको जनाएको छ।
