नरेन्द्र क्षेत्री /कलकत्ता ।भारतीय हकी जगतले आज आफ्ना एक दिग्गज नक्षत्रलाई गुमाएको छ। ओलम्पिक पदक विजेता गुरबख्श सिंह ग्रेवालको ८४ वर्षको उमेरमा निधन भएको छ। पारिवारिक स्रोतका अनुसार हृदयाघातका कारण चण्डीगढ़ नजिकैको जीरकपुरमा उहाँले अन्तिम सास फेर्नुभएको हो।
ग्रेवाल सन् १९६८ को मेक्सिको सिटी ओलम्पिकमा काँस्य पदक जित्ने भारतीय टोलीका महत्त्वपूर्ण सदस्य हुनुहुन्थ्यो। सो ऐतिहासिक ओलम्पिकमा उहाँले आफ्ना भाइ बलबीर सिंह ग्रेवालसँगै भारतीय टोलीको प्रतिनिधित्व गर्नुभएको थियो।
खेल जीवनबाट सन्न्यास लिएपछि पनि उहाँ हकीको विकास र प्रशासनमा निरन्तर सक्रिय रहनुभयो। उहाँले वेस्टर्न रेलवेमा वरिष्ठ खेल अधिकारीका रूपमा कार्य गर्दै धेरै युवा प्रतिभाहरूलाई व्यावसायिक रूपमा अघि बढ्न मार्गनिर्देशन गर्नुभएको थियो। सेवानिवृत्त भएपछि पनि मुम्बईमा रहेर मुम्बई हकी एसोसिएशनको मानद सचिवको पद सम्हाल्दै उहाँले खेल प्रशासनमा अमूल्य सेवा प्रदान गर्नुभयो।
गुरबख्श सिंह ग्रेवालको निधनले भारतीय खेल जगतमा ठूलो क्षति पुगेको छ। हकी प्रतिको उहाँको समर्पण र योगदान खेलप्रेमीहरूका बीचमा सधैं स्मरणीय रहनेछ।
