काठमाडौँ। रसुवामा आएको विनाशकारी बाढीका कारण ज्यान गुमाउनेको संख्या १ हजार ३ सय ४१ पुगेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले भदौ २१ गते बिहान ११ बजेसम्म सार्वजनिक गरेको अद्यावधिक तथ्याङ्कअनुसार बाढीका कारण ठूलो जनधनको क्षति भएको हो।
प्राधिकरणका अनुसार फेला परेका शवमध्ये चितवनमा सर्वाधिक ३६२, नवलपरासी पूर्वमा २२२, नवलपरासी पश्चिममा २२०, रसुवामा १६३, नुवाकोटमा १५५, धादिङमा ६७, गोरखामा ७४ र तनहुँमा ३८ वटा रहेका छन्। फेला परेका शवमध्ये हालसम्म ९८ जनाको मात्र सनाखत भई आफन्तले बुझिलिएका छन्।
बाढीका कारण करिब ४ हजार ९ ९६ जना अझै सम्पर्कविहीन रहेका छन्। जसमा रसुवाका १ हजार ९६७, नुवाकोटका २ हजार ३४०, विदेशी नागरिक करिब ५८९ र सुरक्षाकर्मी तथा कर्मचारी करिब १०० जना रहेका छन्।
१३ हजारभन्दा बढीको उद्धार, उपचार जारी
विपत्पछि तीव्र पारिएको खोज तथा उद्धार कार्यका क्रममा हालसम्म १३ हजार १०४ जनाको सकुशल उद्धार गरिएको छ। उद्धारमा नेपाली सेनाले ४ हजार १६२, नेपाल प्रहरीले ४ हजार ०६८ र सशस्त्र प्रहरी बलले ४ हजार ८७४ जनाको उद्धार गरेका छन्। उद्धारका क्रममा नेपाली सेनाले १७३ पटक र निजी क्षेत्रका हेलिकप्टरले १२९ पटक हवाई उडान भरेका छन्। उद्धार गरिएकाहरूमा ३०४ जना विदेशी नागरिकसमेत रहेका छन्।
त्यस्तै, बाढीमा परी घाइते भएका ६ हजार०७५ जनाको उपचार भइरहेको छ। जसमा नेपाली सेनाबाट ३ हजार २९७, सशस्त्र प्रहरीबाट २ हजार ४६२ र विभिन्न अस्पतालहरूमा ३१६ जनाको उपचार भइरहेको छ।
राहत र सुरक्षाकर्मी परिचालन
प्रभावित क्षेत्रमा राहत तथा उद्धारका लागि २१ हजार ४६५ जना सुरक्षाकर्मी परिचालन गरिएको छ। जसमा ९ हजार २८७ नेपाली सेना, ७ हजार ९७५ नेपाल प्रहरी र ४ हजार २०३ सशस्त्र प्रहरी बलका जवान खटिएका छन्।
काठमाडौँ, रसुवा, नुवाकोट र धादिङका ३९ वटा होल्डिङ सेन्टरमा ३ हजार ६५२ जनालाई राखिएको छ। प्रभावित क्षेत्रमा काठमाडौँबाट ८३ ट्रक र ३८ बोलेरोमार्फत खाद्य तथा गैरखाद्य सामाग्री पठाइएको छ भने ९ वटा हेलिकप्टर उडानमार्फत पनि सामग्री आपूर्ति गरिएको छ।
सरकारले रसुवा र नुवाकोट जिल्लाका लागि १–१ करोड, धादिङका लागि ५० लाख र प्रभावित १५ पालिकाका लागि १३ करोड ५० लाख रुपैयाँ नगद राहत उपलब्ध गराएको छ। प्रभावित क्षेत्रमा इन्धनको अभाव हुन नदिन ४७ हजार लिटर डिजेल, १८ हजार लिटर पेट्रोल र १८ हजार लिटर हवाई इन्धन मौज्दात राखिएको प्राधिकरणले जनाएको छ।
