भद्रपुर (झापा) — झापा जिल्ला प्रशासन कार्यालयले ‘जेन-जी (Gen-Z)’ आन्दोलनका सहिद परिवार तथा घाइतेहरूको जिल्लागत प्रोफाइल तयार गर्ने कार्य अघि बढाएको छ।
नेपाल सरकार मन्त्रिपरिषद्बाट गत असार १८ गते स्वीकृत “जेन-जी आन्दोलनका सहिद परिवार तथा घाइतेहरूका लागि पुनःस्थापना, जीवनयापन तथा सामाजिक संरक्षणसम्बन्धी एकीकृत प्याकेज” मा समावेश २४ बुँदे कार्यक्रमलाई प्रभावकारी रूपमा कार्यान्वयन गर्न प्रोफाइल संकलन थालिएको हो।
जिल्ला प्रशासन कार्यालय झापाका अनुसार जिल्लामा हालसम्म २ सहिद परिवार र ४० जना घाइतेहरू सम्पर्कमा आएका छन्। सम्पर्कमा आएकामध्ये ३७ जनाले घाइते परिचयपत्र प्राप्त गरिसकेका छन् भने स्वास्थ्य तथा खाद्य स्वच्छता मन्त्रालयबाट २८ जना घाइतेको अवस्थाअनुसार वर्गीकरणसमेत भइसकेको छ।
सरकारले घोषणा गरेको नि:शुल्क स्वास्थ्य उपचार, नि:शुल्क शिक्षा, रोजगारीलगायतका राहत कार्यक्रमलाई घाइते तथा सहिद परिवारको वास्तविक माग र आवश्यकतासँग जोड्न अनलाइन फार्ममार्फत विवरण अध्यावधिक गर्ने काम भइरहेको छ। उक्त प्रोफाइलमा व्यक्तिगत विवरण, घटनासम्बन्धी विवरण, आर्थिक तथा सामाजिक अवस्था र सरकारसँगको अपेक्षाजस्ता चार प्रमुख क्षेत्रगत विवरणहरू समेटिनेछन्।
सहिद परिवार र घाइतेको प्रोफाइल तयार भएपछि राहत प्याकेजको कार्यान्वयन र अन्तरनिकाय समन्वय थप प्रभावकारी हुने विश्वास लिइएको छ।
प्रमुख जिल्ला अधिकारी श्रवणकुमार पोखरेलका अनुसार प्रोफाइल निर्माण कार्यका लागि हालसम्म सम्पर्कमा नआउनुभएका ‘जेन-जी’ आन्दोलनका घाइतेहरूलाई यथाशीघ्र जिल्ला प्रशासन कार्यालय झापामा सम्पर्क गर्न आग्रह गरिएको छ।
