झापा, २८ कात्तिक । झापाको मेचीनगरबाट भन्सार छली गरी भारतबाट नेपालतर्फ ल्याउँदै गरिएको रु ५ लाख ६१ हजारभन्दा बढी मूल्यको सामान र एउटा अटो प्रहरीले बरामद गरेको छ।
सशस्त्र प्रहरी बल, नेपाल नम्बर २ गण हेडक्वार्टर झापाबाट खटिएको मोबाइल गस्ती टोलीले मेचीनगर नगरपालिका–११ स्थित धाइजन क्षेत्रमा उक्त सामान बरामद गरेको हो। भारतबाट भन्सार छली गरी अटोमा लोड गरेर नेपालतर्फ ल्याउँदै गरेको अवस्थामा अटो र त्यसमा लोड गरिएका लत्ताकपडा तथा भाँडावर्तन बरामद गरिएको सशस्त्र प्रहरीले जनाएको छ।
बरामद गरिएका सामान र अटोसहितको कुल अनुमानित मूल्य रु ५ लाख ६१ हजार ४०० रहेको छ। नियन्त्रणमा लिइएका सम्पूर्ण सामग्रीहरू आवश्यक कारबाहीका लागि भद्रपुर भन्सार कार्यालयमा बुझाइएको सशस्त्र प्रहरी बलले जनाएको छ।
