काठमाडौं,२०७७ माघ १७ गते l  कास्की, पोखरा महानगरपालिका-३० गगनगौडाबाट नियन्त्रित लागूऔषध ३७ एम्पुल डाईजेपाम, ३७ एम्पुल फेनारगन र ३७ एम्पुल नुर्फिन सहित २ जनालाई बिहीबार बेलुका प्रहरीले पक्राउ गरेको छ । पक्राउ पर्नेहरूमा पोखरा महानगरपालिका-१७ छोरेपाटन बस्ने धादिङ घर भएका २९ वर्षीय दिपक थापा र पोखरा महानगरपालिका-२१ स्थायी वतन भएका २७ वर्षीय सन्तोष सुबेदी रहेका छन् । ग.१७ प ५५८४ नम्बरको स्कुटरलाई ईलाका प्रहरी कार्यालय शिसुवा डाँडाकोनाकबाट खटिएको प्रहरीले जाँच गर्ने क्रममा स्कुटरमा सवार उनीहरूलाई उक्त लागूऔषध, नगद ९ हजार ३ सय १० रुपैयाँ र २ थान मोबाइल सहित फेला पारी पक्राउ गरेको हो ।

सुर्खेत, वीरेन्द्रनगर नगरपालिका-४ एकतानगर टोलबाट करिब ३ सय ६० मिलिग्राम अवैध लागूऔषध ब्राउनसुगर जस्तो देखिने पदार्थ र नियन्त्रित लागूऔषध नाईट्रोभेट १७ ट्याब्लेट सहित २ जनालाई शुक्रबार दिउँसो प्रहरीले पक्राउ गरेको छ । पक्राउ पर्नेहरु बाँके खजुरा गाउँपालिका-८ बस्ने २८ वर्षीय सब्बिर खाँ र सोही ठाउँ बस्ने २८ वर्षीय सदाम खाँ रहेका छन् । उनीहरुले लागूऔषध बेचबिखन गरिरहेको भन्ने खबर प्राप्त हुनासाथ जिल्ला प्रहरी कार्यालय सुर्खेतबाट खटिएको प्रहरीले उनीहरुको कोठा तलासी गर्दा कोठामा लुकाई राखेको उक्त परिमाणको लागूऔषध फेला पारेको हो ।
पर्सा, कालिकामाई गाँउपालिका-३ हरिहरपुर बस्ने ३० वर्षीय प्रेम हजारालाई करिब ४ सय ग्राम अवैध लागूऔषध चरेश र १ केजी १ सय ग्राम गाँजा सहित शुक्रबार दिउँसो प्रहरीले पक्राउ गरेको छ । ईलाका प्रहरी कार्यालय कालिकामाईबाट खटिएको प्रहरीले उनलाई उक्त परिमाणको लागूऔषध सहित फेला पारी पक्राउ गरेको हो ।

यसैगरी पर्सा, वीरगंज महानगरपालिका-१६ रजतजयन्ती चोकबाट मकवानपुर हेटौंडा उपमहानगरपालिका-१२ बस्ने २५ वर्षीय साजत थिङलाई नियन्त्रित लागूऔषध १ सय ५२ एम्पुल नुर्फिन, १ सय ५२ एम्पुल फेनारगन, १ सय ५२ एम्पुल डाईजेपाम, नाईट्रोभेट ३० ट्याब्लेट र एकसय एमएलको WINGS BIOTECH १ सय बोतल सहित शुक्रबार दिउँसो प्रहरीले पक्राउ गरेको छ । ना.२५ प ४२१६ नम्बरको स्कुटरलाई प्रहरी चौकी ईनर्वाबाट खटिएको प्रहरीले जाँच गर्ने क्रममा स्कुटरमा सवार उनलाई उक्त लागूऔषध सहित फेला पारी पक्राउ गरेको हो ।
कञ्चनपुर, भिमदत्त नगरपालिका-१८ सिद्धटोलबाट लागूऔषध १ ग्राम ८८ मिलिग्राम खैरो हिरोईन जस्तो देखिने पदार्थ सहित भिमदत्त नगरपालिका-१८ कञ्चनपुर बस्ने २२ वर्षीय बिवस बिष्ट समेत २ जनालाई शुक्रबार राति प्रहरीले पक्राउ गरेको छ । जिल्ला प्रहरी कार्यालय कञ्चनपुरबाट खटिएको प्रहरीले उनीहरुलाई उक्त परिमाणको लागूऔषध सहित फेला पारी पक्राउ गरेको हो ।

बारा, जितपुर सिमरा उपमहानगरपालिका-१ स्थित सडकबाट नियन्त्रित लागूऔषध नाईट्रोभेट ५ सय ७६ ट्याब्लेट सहित ललितपुर महानगरपालिका-३ बस्ने २३ वर्षीय सुदेश खत्रीलाई शनिबार बिहान प्रहरीले पक्राउ गरेको छ । निजगढबाट काठमाडौंतर्फ जाँदै गरेको बा.३४ प७२२५ नम्बरको मोटरसाइकललाई प्रहरी चौकी पथलैयाबाट खटिएको प्रहरीले जाँच गर्ने क्रममा चालक खत्रीलाई उक्त परिमाणको लागूऔषध सहित फेला पारी पक्राउ गरेको हो ।
यस सम्बन्धमा स्थानीय प्रहरीले थप अनुसन्धान गरिरहेको छ ।