झापा । झापाको बिर्तामोड नगरपालिका–४, पुरानो भद्रपुर रोडबाट हिजो असार २ गते विहान करिब ८:४५ बजे प्रहरीले लागुऔषधसहित दुई जनालाई पक्राउ गरेको छ।
इलाका प्रहरी कार्यालय अनारमनीबाट खटिएको प्रहरी टोलीले झापा दमक नगरपालिका–१ बस्ने ३२ वर्षीय विजय कर्माकार र ऐनुमानगर निवासी ३५ वर्षीय सन्तोष मिस्त्रीलाई नियन्त्रणमा लिएको हो। उनीहरूको साथबाट खैरो लिसाइलो पदार्थ (ब्राउन सुगर जस्तो देखिने) प्लास्टिकसहित १५ ग्राम र प्लास्टिक बाहेक १३.३६ ग्राम (३६० मिलिग्राम) फेला परेको प्रहरीले जनाएको छ।
साथै, उनीहरूबाट दुई थान एन्ड्रोइड मोबाइल फोन र को ३५ प ९०६९ नम्बरको मोटरसाइकल समेत बरामद गरिएको छ। हाल उनीहरूलाई इलाका प्रहरी कार्यालय अनारमनीमा राखी थप अनुसन्धान भइरहेको जिल्ला प्रहरी कार्यालय झापाले जानकारी दिएको छ।
