महेन्द्रनगर, कञ्चनपुर | नेपालका अग्रणी स्वयंसेवी रक्तदाता प्रेमसागर कर्माचार्यले शुक्रबार कञ्चनपुरको महेन्द्रनगरस्थित रक्तसञ्चार केन्द्रमा १८३ औं पटक रक्तदान गरेका छन्।
नेपाल स्वयंसेवी रक्तदाता समाजका केन्द्रीय अध्यक्ष समेत रहेका कर्माचार्यले जनस्वास्थ्य प्रवर्द्धन र जीवनरक्षामा सन्देश दिने उद्देश्यले नियमित रक्तदानलाई जीवनशैलीको रूपमा अगाडि सारेका छन्।
उनी भन्छन्, “रगतको विकल्प केही छैन। १८ वर्ष पुगेका स्वस्थ व्यक्तिहरूले जन्मदिन रक्तदान गरेर मनाउनुपर्छ। त्यो नै साँचो उत्सव हो।”
“रक्त बेचबिखन अमानवीय हो”
कर्माचार्यले दान गरिएको रगतमा शुल्क लिनु अमानवीय भएको बताउँदै संस्थागत रूपमा निःशुल्क रक्तसेवा सुनिश्चित गर्न सरकारलाई आग्रह गरेका छन्।
“रक्तदाताले निःस्वार्थ सेवा दिन्छन् तर नागरिकसँग परीक्षण शुल्कको नाममा पैसा असुलिन्छ। दान गरिएको वस्तु बेचबिखन गर्नु अमानवीय हो,” उनको भनाइ छ।
स्वास्थ्य सचेतनादेखि सहानुभूतिसम्म
“रक्तदाताले कहिल्यै सीमा हेर्दैनन्” भन्ने नारासहित कर्माचार्यले जुम्ला, डडेल्धुरा, बाँके, बर्दिया, गोरखा, स्याङ्जा, बझाङ, नुवाकोट लगायत जिल्लामा रक्तदान कार्यक्रम सञ्चालन गरी युवामाझ स्वास्थ्य सचेतना फैलाउँदै आएका छन्।
उनले वर्षमा कम्तीमा चार पटक रक्तदान कार्यक्रम सञ्चालन गर्नुपर्नेमा जोड दिएका छन्।
प्रेरणाको पात्र
स्वास्थ्य, मानवता र सहानुभूतिमा समर्पित कर्माचार्यलाई विभिन्न संस्थाले “रक्त सम्राट”, “राष्ट्रिय रक्तनायक” जस्ता उपाधिले सम्मानित गरिसकेका छन्।
१८३ औं पटकको रक्तदान कर्माचार्यको समर्पणको प्रतीक मात्रै होइन, सामाजिक उत्तरदायित्व र प्रेरणाको जीवित पाठशाला पनि हो। “रगत दान गरौं, जीवन बचाऔं” — यो नारालाई कर्ममार्फत सार्थक बनाउँदै आएका छन् प्रेमसागर कर्माचार्य।
