झापा । नेपाल रेडक्रस सोसाइटीको केन्द्रीय कार्यालयमा रेडक्रसकर्मी पुष्पराज पौडेलको कृति ‘रेडक्रसका चम्किला तारा’ औपचारिक रूपमा सार्वजनिक गरिएको छ।
२८८ पृष्ठको यस कृतिमा स्वदेशी र विदेशी गरी ५३ जना रेडक्रसका अग्रजहरूको जीवनयात्रा र योगदानको विस्तृत विवरण समेटिएको छ। पुस्तकमा झापा रेडक्रसका सभापति लोकराज ढकालको समाजसेवामुखी यात्रा र उपलब्धिलाई पनि विशेष स्थान दिइएको छ।
कार्यक्रममा शताब्दी पुरुष डा. गौरीशंकर लाल दासले पुस्तकको लोकार्पण गरे। कृतिमाथि वरिष्ठ साहित्यकार तथा समीक्षक हरिहर अधिकारी र दिव्यराज पौडेलले समीक्षा प्रस्तुत गरेका थिए।
कृतिकार पौडेलले लामो समय रेडक्रस सेवामा रहँदा विभिन्न प्रेरणादायी व्यक्तिहरूलाई नजिकबाट चिनेको अनुभव साझा गर्दै, यही प्रेरणाले पुस्तक लेख्ने चाहना जागेको बताए।
