पोखरा। नेपाल यातायात व्यवसायी राष्ट्रिय महासंघको अध्यक्षमा पुष्पप्रसाद सिटौला ( सरोज) निर्वाचित हुनुभएको छ। पोखरामा सम्पन्न महाधिवेशनमा सिटौलाले ९०३ मत प्राप्त गर्दै आफ्ना प्रतिस्पर्धी हरिशरण केसीलाई ४३९ मतान्तरले पराजित गर्नुभएको हो।
यसअघि वरिष्ठ उपाध्यक्ष रहनुभएका सिटौलाको प्यानलबाटै महासचिवमा धनञ्जय गौतम र कोषाध्यक्षमा राजेश आचार्य पनि विजयी हुनुभएको छ। यस्तै वरिष्ठ उपाध्यक्षका तीन पदमा सानुकाजी प्रजापति, एनकुमार साई र केदारप्रसाद पौडेल चुनिनुभएको छ।
नवनिर्वाचित अध्यक्ष सिटौलाले नेपालको सार्वजनिक यातायातलाई व्यवस्थित बनाउन अब अनिवार्य जीपीएस र ई-टिकटिङ प्रणाली लागू गर्ने घोषणा गर्नुभएको छ। व्यवसायीको लगानी सुरक्षा र बीमालाई व्यवस्थित बनाउँदै प्रविधिमैत्री सेवा प्रवाह गर्नु आफ्नो मुख्य प्राथमिकता रहेको उहाँको भनाइ छ।
