बुद्धशान्ति (झापा), १२ असार
झापाको बुद्धशान्ति गाउँपालिकाको १८औँ गाउँसभाको पहिलो चरणको अधिवेशन नीति, कार्यक्रम र बजेट अनुमोदन गर्दै सफलतापूर्वक सम्पन्न भएको छ। गाउँपालिकाको सभाहलमा आयोजित अधिवेशनमा पालिकाको आगामी आर्थिक वर्ष २०८३/०८४ को भावी दिशा र योजनाहरूलाई मूर्तरूप दिइएको हो।
गाउँसभाको मुख्य आकर्षणका रूपमा गाउँपालिका अध्यक्ष मनोज प्रसाईले आगामी आर्थिक वर्ष २०८३/०८४ का लागि नीति तथा कार्यक्रम प्रस्तुत गर्नुभएको थियो। अध्यक्ष प्रसाईले प्रस्तुत गर्नुभएको नीति तथा कार्यक्रममा शिक्षा क्षेत्रमा सुधारात्मक कार्यक्रम, स्वास्थ्य सेवाको सुदृढीकरण, पर्यटन प्रवर्द्धन, स्थानीय उत्पादनको संरक्षण तथा प्रवर्द्धन र व्यापक रोजगारी सिर्जनालाई मुख्य प्राथमिकतामा राखिएको छ। यसका साथै दिगो विकास, भौतिक पूर्वाधार निर्माण तथा सुशासनयुक्त नागरिकमैत्री सेवा प्रवाहलाई विशेष महत्व दिँदै ‘समृद्ध बुद्धशान्ति’ निर्माणको संकल्प अध्यक्षले अघि सार्नुभयो। उक्त नीति तथा कार्यक्रमलाई सभाले सर्वसम्मत रूपमा पारित गरेको छ।
अध्यक्षद्वारा प्रस्तुत सोही नीति र कार्यक्रमलाई कार्यान्वयन गर्नका निम्ति गाउँपालिका उपाध्यक्ष भवानीप्रसाद खतिवडाले कुल रु. ६४ करोड १८ लाख ३० हजार ७ सय ६७ बराबरको बजेट सभा समक्ष प्रस्तुत गर्नुभएको थियो। उपाध्यक्ष खतिवडाले प्रस्तुत गर्नुभएको बजेटले पालिकाको प्राथमिकता प्राप्त क्षेत्रहरू, विशेष गरी शिक्षा, स्वास्थ्य र स्थानीय उत्पादनको प्रवर्द्धनका योजनाहरूलाई आवश्यक वित्तीय स्रोत सुनिश्चित गरेको छ।
उत्कृष्ट उपभोक्ता समिति र कर्मचारी सम्मानित
अधिवेशनको अवसरमा पालिकाले विकास निर्माण र सेवा प्रवाहमा ऊर्जा थप्न सम्मान कार्यक्रम पनि आयोजना गर्यो। गाउँपालिकाभित्रका सातवटै वडाबाट स्थानीय स्तरमा उत्कृष्ट कार्यसम्पादन गरेका उपभोक्ता समितिहरूलाई नगद पुरस्कार तथा प्रमाणपत्रसहित सम्मान गरिएको थियो।
त्यस्तै, गाउँपालिका मातहत कार्यरत उत्कृष्ट ६ जना कर्मचारीहरूलाई कार्यसम्पादनको कदर गर्दै नगद पुरस्कार र प्रमाणपत्रसहित ‘उत्कृष्ट कर्मचारी’ का रूपमा सम्मान गरियो। सम्मानित हुने कर्मचारीहरूमा कमलप्रसाद निरौला, मनमोहन सिग्देल, मनिषा तोलाङ्गी, राम राई, सुरेन्द्र गुप्ता र पुण्यमाया कट्टेल रहनुभएको छ।
जनप्रतिनिधि, कर्मचारी तथा स्थानीय सरोकारवालाहरूको व्यापक सहभागिता रहेको यस गाउँसभाले पारित गरेको नीति, कार्यक्रम र बजेटले आगामी वर्षमा पालिकाको समग्र विकासलाई थप गतिशील बनाउने विश्वास लिइएको छ।
